David Alvarado analiza en Ourense a crise de Ceuta e as relacións entre España e Marrocos o martes
O Ateneo de Ourense organizou para o vindeiro martes, 20 de outubro, unha nova conferencia dentro da súa programación habitual de actividades culturais e de pensamento. Nesta ocasión, o encontro abordará a tensión vivida nos últimos meses en Ceuta, así como o complicado entramado de relacións diplomáticas entre o estado español e o reino alauita.
O encargado de desenvolver a charla será David Alvarado Roales, doutor en Ciencia Política, profesor universitario, consultor internacional, xornalista e escritor. Alvarado dirixe o Observatorio Internacional para a Paz e sobre as Migracións (OIPAMI) e é investigador asociado do Centre d'Études et Recherches en Sciences Sociales (CERSS), entre outras vinculacións académicas e institucionais.
É ademais autor de varias obras centradas no norte de África e o mundo árabe, entre elas 'Alá, patria y Rey: Marruecos, transición a ninguna parte' (2022), 'Rif. De Abdelkrim a los indignados de Alhucemas' (2017) e 'La Yihad a nuestras puertas' (2011).
Segundo trasladou o propio Ateneo, a intervención de Alvarado ofrecerá unha visión obxectiva, baseada no seu amplo coñecemento sobre a rexión do Magreb, acerca da problemática e a complexidade que atravesan actualmente as relacións entre España e Marrocos, tomando como punto de partida o sucedido en Ceuta nos meses recentes.
A cita terá lugar ás 19.00 horas no Salón de Actos do Centro Cultural Marcos Valcárcel, situado na rúa do Progreso, número 30, en Ourense.