Deputación e Colexio de Enfermaría reforzan a súa colaboración para impulsar accións de prevención e promoción da saúde
O presidente da Deputación de Ourense, Luis Menor, mantivo un encontro institucional coa nova presidenta do Colexio Oficial de Enfermaría de Ourense, María José Menor, co obxectivo de analizar as vías de colaboración entre ambas entidades e establecer novas liñas de traballo centradas na saúde e no benestar da poboación.
A reunión, celebrada no Pazo Provincial, serviu para facer unha primeira toma de contacto tras a recente incorporación de María José Menor á presidencia do colexio profesional, cargo que asumiu o pasado mes de xuño. Durante o encontro, ambas partes coincidiron na importancia de manter unha colaboración estable que permita desenvolver iniciativas de interese para a provincia.
Luis Menor expresou a súa vontade de dar continuidade ao traballo conxunto que xa existe entre a Deputación e o Colexio de Enfermaría, prestando especial atención a aquelas actuacións relacionadas coa promoción de hábitos de vida saudables, a prevención de enfermidades e a educación para a saúde, co propósito de contribuír á mellora da calidade de vida da cidadanía.
Pola súa banda, María José Menor presentou ao presidente provincial os principais proxectos que pretende impulsar a nova directiva da entidade profesional nesta etapa. A responsable do colexio destacou o papel da Deputación como un aliado fundamental para facer chegar estas iniciativas ao conxunto do territorio ourensán, aproveitando a capacidade da institución para chegar aos diferentes concellos da provincia.
O encontro rematou co compromiso de ambas institucións de continuar fortalecendo a súa cooperación e avanzar na posta en marcha de actuacións que repercutan positivamente na saúde da veciñanza e na promoción de hábitos preventivos en toda a provincia.