Derradeiros días para apuntarse á escola gratuíta de gaita, pandeireta e canto de Castrelo de Miño
As persoas interesadas en formar parte das clases de gaita, pandeireta e canto popular que organiza o Concello de Castrelo de Miño dispoñen aínda duns días para formalizar a súa inscrición, xa que o prazo remata o 20 de outubro.
A iniciativa, aberta a calquera persoa maior de 4 anos, comezou o pasado venres 2 de outubro da man da profesora Ana Belén Rodríguez André e prolongarase, con clases semanais os venres de 17.00 a 19.00 horas na Sala Multiusos do Albergue Municipal, ata o mes de maio.
Unha das claves desta proposta é que resulta completamente gratuíta para quen participa, grazas ao respaldo da Deputación de Ourense, coa que o Concello quere seguir impulsando a cultura tradicional do municipio.
Cómpre lembrar que o trámite só afecta aos novos alumnos: quen xa asistiu durante o curso 2025/26 e queira repetir non precisa volver inscribirse.
Para sumarse ás clases, abonda con chamar ao Concello de Castrelo de Miño, no teléfono 988 49 30 00, en horario de atención de luns a venres, de 09.00 a 14.00 horas.