Esgos acolle unha nova xornada de asesoramento do programa Re-Habita Rural Lab
O Concello de Esgos celebrará a vindeira semana unha nova sesión informativa do programa Re-Habita Rural Lab, centrado na rehabilitación de vivenda no ámbito rural e na mobilización de inmobles.
A iniciativa está dirixida a persoas propietarias de vivendas que precisen reformas ou que estean interesadas en coñecer opcións para a cesión ou transmisión dos seus inmobles. O obxectivo da sesión é ofrecer orientación sobre o acceso ás axudas e subvencións públicas, un aspecto que concentra unha parte importante das consultas recibidas ata o momento.
Segundo os datos do programa, rexistráronse xa 170 solicitudes, das cales arredor do 60% corresponden a persoas que demandan información máis detallada sobre estas liñas de apoio para a rehabilitación.
O asesoramento terá lugar o martes 16 de xuño, en horario de 15:30 a 20:00 horas, na biblioteca municipal de Esgos.
Desde a organización anímase á veciñanza a participar na sesión para resolver dúbidas e coñecer as diferentes opcións dispoñibles para manter e recuperar o patrimonio inmobiliario do municipio.