Esgos, Nogueira de Ramuín e Paderne de Allariz impulsan un programa de verán para o benestar, a formación e o empoderamento das mulleres
Os Concellos de Esgos, Nogueira de Ramuín e Paderne de Allariz poñen en marcha este verán o programa “Maruxa Mallo”, unha iniciativa conxunta dirixida ás mulleres dos tres municipios, centrada no seu benestar, formación e empoderamento.
A iniciativa contempla a realización de obradoiros e actividades formativas, así como a prestación de apoio psicolóxico, xurídico e laboral. Ademais, ofrecerase orientación personalizada co obxectivo de mellorar as oportunidades e recursos dispoñibles para as participantes.
O programa tamén inclúe ferramentas orientadas a reforzar a autoestima, a saúde e a empregabilidade, así como accións específicas de prevención da violencia de xénero e promoción da igualdade.
Segundo se indica, trátase dun espazo pensado para compartir experiencias, aprender e fortalecer capacidades nun ambiente de apoio e participación, dirixido ás mulleres dos tres municipios implicados.