Esgos organiza mañá unha charla sobre dereitos e recursos dirixida a mulleres de todas as idades
O concello de Esgos celebrará o vindeiro xoves 17 de setembro unha charla titulada 'Mulleres coñecendo os seus dereitos e recursos', unha actividade pensada para mulleres de todas as idades que se desenvolverá a partir das 17.00 horas no Centro Cultural Parada Justel.
A iniciativa enmárcase dentro do programa Maruxa Mallo e ten como finalidade principal o empoderamento feminino, ofrecendo ás participantes información sobre os dereitos que lles asisten e os recursos dispoñibles aos que poden acudir en caso de necesitalo.
Aquelas persoas interesadas en obter máis información poden dirixirse aos servizos sociais do seu respectivo concello. Para iso, habilitouse un número de WhatsApp de contacto (685211882), así como os seguintes enderezos de correo electrónico, vinculados aos departamentos de servizos sociais dos concellos implicados na organización desta xornada:
- Concello de Esgos: servizosociais@concelloesgos.com
- Concello de Paderne de Allariz: servizossociaisconcellodepaderne@hotmail.com
- Concello de Nogueira de Ramuín: katia.pulido.nogueiraderamuin@eidolocal.es
Esta charla enmárcase dentro das subvencións destinadas a entidades locais da Comunidade Autónoma de Galicia para a promoción da igualdade e a prevención da violencia de xénero, correspondentes ao programa S435A. A actuación conta con cofinanciamento da Unión Europea a través de fondos europeos, dentro dun obxectivo máis amplo orientado a previr a violencia de xénero e mellorar a situación tanto das vítimas como das mulleres que se atopan en situación de vulnerabilidade.