Guadi Galego ofrecerá dous concertos íntimos en Ourense dentro da súa nova xira en formato reducido
A cantante e compositora Guadi Galego volve aos escenarios de pequeno formato cunha proposta baixo o nome de 'Oníricos e outros delirios', un proxecto co que pretende recuperar a proximidade co público a través dun espectáculo íntimo en formato trío.
Dentro desta nova xira, a artista actuará en Ourense os días 13 e 14 de novembro no Café Auriense, un escenario co que mantén unha relación especial, xa que foi punto de partida e de peche de varias etapas da súa traxectoria. As entradas para ambas as datas sairán á venda este venres, 2 de outubro, ás 12.00 horas, a través da plataforma Enterticket.es, cun prezo de 20 euros máis gastos de xestión e un aforo moi reducido.
Nestes concertos, Guadi Galego interpretará temas do seu último disco, 'Pélago. Contos oníricos', xunto con algúns dos seus temas máis coñecidos e outras composicións que nunca antes levara ao directo. O espectáculo chega despois do concerto de peche da súa anterior xira, celebrado o pasado ano na sala Capitol.
Para esta nova proposta, a artista concibiu un directo en formato trío xunto a Vic Moliner, un dos produtores das súas últimas gravacións, e Iago Carro. Segundo se explica, o obxectivo do grupo é poñer en valor a música en directo e trasladar ao público o proceso de creación das cancións, afastándose das dinámicas de consumo rápido que, sinalan, predominan actualmente no panorama musical. Nesta formación, o piano de Guadi combínase co baixo e os sintetizadores de Vic Moliner e a batería de Iago Carro.
Unha traxectoria consolidada na música galega
Guadi Galego é unha das figuras de referencia da música galega contemporánea. Compositora, intérprete e produtora, comezou a súa carreira como integrante de Berrogüetto, unha das bandas máis destacadas do folk galego, antes de desenvolver unha carreira en solitario que a consolidou como unha das voces máis relevantes dos últimos anos.
Ao longo da súa carreira participou en proxectos xunto a outras figuras destacadas da música galega, como Abe Rábade e Ugia Pedreira en Nordestin@s, ou Guillerme Fernández, Xabier Díaz e Xosé Lois Romero en aCadaCanto, ademais de colaborar con artistas como Iván Ferreiro, Vega, Andrés Suárez, Tanxugueiras e Xabier Díaz, entre outros.
A súa traxectoria foi recoñecida con galardóns como o Premio da Crítica de Galicia, varios Premios Martín Códax da Música ou o Premio Rebulir da Cultura Galega, entre outros recoñecementos que avalan o seu papel dentro da música galega actual.