José Manuel Gil será o novo portavoz do PP de Maceda tras a renuncia de Rubén Quintas
O presidente da xestora local do Partido Popular de Maceda, José Manuel Gil, será o novo portavoz do grupo municipal popular, logo de que o actual primeiro edil da formación, Rubén Quintas, presentara a súa renuncia á acta como concelleiro por razóns profesionais e laborais. O relevo consumarase no pleno extraordinario que se celebrará o próximo día 20, en cuxa orde do día figurará a decisión de Rubén Quintas, que será substituído por Emiliano Rodríguez González.
Tanto o presidente provincial do PP, Luis Menor, como o presidente da xestora local expresaron o seu máximo respecto á decisión de Rubén Quintas de dar un paso ao lado para pechar o proceso de renovación da agrupación do PP en Maceda. Neste sentido, Luis Menor e José Manuel Gil tiveron palabras de agradecemento para Quintas polo traballo realizado tanto desde a presidencia do PP local durante doce anos, como o seu labor durante dous mandatos consecutivos á fronte da alcaldía de Maceda, ademais destes tres anos na oposición.
“Rubén Quintas seguirá contribuíndo a que o PP recupere a alcaldía de Maceda”, manifestou Luis Menor tras reunirse co ata de agora portavoz, lanzando a José Manuel Gil o desafío de “poñer o partido a toda máquina para estar preparado ante calquera convocatoria electoral”, coa responsabilidade engadida de “fiscalizar o traballo do goberno socialista e visibilizar ao PP ante a cidadanía de Maceda como “unha opción de confianza” para as municipais de 2027.