Leiro prepárase para a XXXV Festa da Vendima cos viños do Ribeiro como protagonistas
Leiro acollerá o vindeiro domingo 30 de agosto unha nova edición da súa Festa da Vendima, unha celebración que alcanza este ano a súa trixésimo quinta edición e que volverá poñer en valor a tradición vitivinícola da comarca e os viños da Denominación de Orixe Ribeiro. A festa, declarada de Interese Turístico de Galicia, manterá a súa celebración o último domingo de agosto e contará tamén con actividades durante a xornada do sábado.
A programación arrancará xa o sábado 29 de agosto ás 18.00 horas cunha ludoteca infantil e unha festa de apertura. Ás 21.00 horas inaugurarase a VI Mostra de Viños de Leiro e, a partir das 22.00 horas, haberá música en directo.
O domingo, día grande da celebración, as actividades comezarán ás 10.00 horas coa recepción dos acios que participarán no concurso e a súa posterior exposición. Ás 11.30 horas terá lugar a recepción das autoridades e, media hora despois, a Praza do Cruceiro acollerá o pregón, que este ano correrá a cargo da actriz Mabel Lozano.
Ás 12.15 horas comezará un dos actos centrais da Festa da Vendima, o desfile de carrozas e charangas, que percorrerá o traxecto entre a rúa Gabino Bugallal e o Campo da Feira. A programación incluirá ademais a VIII Concentración de Coches Clásicos.
A actividade continuará ás 14.30 horas coa visita ao XXI Mercado Artesanal, situado no Salgueiral, seguida da comida popular. Ás 16.30 horas celebrarase a entrega de premios dos concursos de Acios e de Carrozas, tras a cal haberá actividades infantís e festa no Salgueiral.
A xornada contará tamén cunha cita deportiva ás 17.45 horas, cun partido de fútbol de veteranos. Pola tarde-noite, ás 20.00 horas, celebrarase o concerto “Corais da Vendimia” e, ás 22.00 horas, haberá unha nova actuación musical no Salgueiral.
A Festa da Vendima de Leiro naceu en 1963 da man do Concello e, desde o ano 2000, celébrase o último domingo de agosto. A celebración mantén a súa estreita vinculación coa cultura do viño e coa tradición vitivinícola do Ribeiro, convertendo a vendima no eixo dunha xornada que combina actividades culturais, gastronómicas, festivas e de lecer para diferentes públicos.
PROGRAMA COMPLETO DA XXXV FESTA DA VENDIMA DE LEIRO