Maceda amplía o obradoiro para construír visores solares tras a boa acollida da iniciativa
O interese xerado entre a veciñanza levou ao Concello de Maceda a ampliar a programación do obradoiro dedicado á construción de caixas de visualización da eclipse. Ante a elevada demanda, a actividade contará con dúas novas sesións nas que as persoas participantes poderán aprender a fabricar un visor solar de forma sinxela, segura e empregando materiais reciclados.
As novas convocatorias celebraranse o 30 de xullo, ás 16:30 horas, e o 3 de agosto, ás 11:00 horas, na Biblioteca Pública Municipal de Maceda, espazo que volverá acoller esta proposta de carácter divulgativo.
Durante o obradoiro, os asistentes coñecerán o proceso para elaborar un dispositivo que permite observar unha eclipse con total seguridade, ao tempo que se fomenta o aproveitamento de materiais de uso cotián e a sensibilización sobre a súa reutilización.
Para participar será necesario que cada persoa leve unha caixa de cartón, preferiblemente do tipo utilizado para cereais ou galletas, xa que será o elemento principal para a elaboración do visor solar.
Desde o Concello destacan que a actividade é gratuíta e está aberta a persoas de todas as idades, polo que animan tanto ás familias como ao resto da cidadanía a aproveitar esta oportunidade para achegarse á astronomía dunha maneira práctica e participativa.
Con esta ampliación, Maceda responde ao éxito de convocatoria da iniciativa e reforza a súa aposta por actividades que combinan divulgación científica, educación ambiental e aprendizaxe creativa.