Maceda encherase este venres de música cos Cantos de Taberna
Maceda celebra este 1 de maio unha nova edición dos Cantos de Taberna, unha cita que levará a música tradicional galega a distintos locais do municipio ao longo da noite.
A xornada comezará ás 20:00 horas na Praza das Toldas, cunha primeira actuación que servirá de punto de partida para un percorrido musical que se estenderá ata as 23:00 horas por varios establecementos hostaleiros.
Entre as 20:30 e as 21:20 horas, os diferentes grupos participantes actuarán repartidos por locais como Porta Sacra, Mioco, Ondo Aspas, Casa Rosa, A Fenda e A Cervexería. Nesa primeira rolda participarán formacións como Pandereteiras do Castelo, Xunquereteiras, Xolda, Netas do Arnoia, Lobo da Xente e Tabouca.
A música continuará cunha segunda quenda de actuacións entre as 21:20 e as 22:10 horas, na que os grupos irán rotando polos distintos espazos, permitindo ao público seguir gozando dunha ampla variedade de propostas musicais.
A última parte da noite desenvolverase entre as 22:10 e as 23:00 horas, completando así un percorrido que converterá Maceda nun escenario vivo de música e ambiente festivo.
Os Cantos de Taberna consolidan así a súa presenza no calendario cultural da localidade, promovendo a tradición musical galega e dinamizando a vida social e hostaleira da vila.