Miles de persoas reuníronse nas Barcias na Festa da Xuventude do Carballiño
O Concello do Carballiño fai unha valoración positiva da celebración da Festa da Xuventude, que este ano cambiou o seu emprazamento habitual polas Barcias debido ao importante aumento da asistencia e ás limitacións de seguridade que presentaba o espazo anterior.
A cita reuniu miles de persoas, principalmente rapaces e rapazas novas, o que fixo necesario despregar un amplo dispositivo de seguridade. Nel participaron efectivos da Policía Local, Garda Civil, Protección Civil, Bombeiros e diferentes servizos municipais de emerxencia e sanitarios.
O goberno municipal considera que a elevada participación e o traslado da celebración ás Barcias representan un novo desafío no ámbito da seguridade. Por este motivo, de cara á próxima edición da Festa do Pulpo, o Concello prevé analizar novas medidas e ampliar as xa existentes para responder ao volume de asistentes.
En paralelo, o Concello continuará apelando á responsabilidade individual para evitar condutas que poidan poñer en risco tanto ás propias persoas como a terceiros. Desde o goberno municipal sinalan que determinadas situacións de risco están relacionadas, en ocasións, co consumo de alcohol.
Durante a celebración, os efectivos de seguridade realizaron varias intervencións, especialmente nas zonas próximas ao río, co obxectivo de previr situacións perigosas e impedir que persoas que se atopaban baixo os efectos do alcohol accedesen á auga.
O Concello desmente tamén de maneira categórica a información difundida a través das redes sociais sobre o suposto falecemento dunha moza no río. O goberno municipal pide responsabilidade á hora de compartir este tipo de contidos, ao considerar que poden xerar unha situación de alarma innecesaria entre a poboación.
No marco das actuacións realizadas durante a festa, efectivos da Policía Local axudaron a saír do río a unha persoa que posteriormente foi trasladada en ambulancia ao atoparse baixo os efectos do alcohol.
O Concello considera que o desenvolvemento da Festa da Xuventude e a elevada afluencia rexistrada nas Barcias permiten avaliar o novo espazo como unha alternativa ante o crecemento da participación, aínda que tamén supoñen a necesidade de seguir reforzando e mellorando o dispositivo de seguridade para futuras edicións.