Morre o histórico presentador galego Xosé Manuel Piñeiro
O histórico presentador Xosé Manuel Piñeiro (Allariz, 1957), faleceu este luns aos 68 anos a causa do cancro que padecía dende 2018.
Tamén coñecido como o Superpiñeiro polo seu papel como presentador do Supermartes, Piñero converteuse nunha das caras máis queridas e coñecidas da Televisión de Galicia. Unha extensa traxectoria coa que logrou, en 2014, facerse como Premio Rebulir á Cultura Galega.
Ademais da súa faceta como xornalista e presentador de televisión, Piñeiro era licenciado en Filosofía e Ciencias da Educación, e traballou como educador e orientador nos institutos ourensáns de Finca Sevilla (actualmente chamado IES Ferro Couselo) e As Lagoas, así como na Universidade Laboral de Ourense.
O Concello de Allariz lamenta a perda
O Concello de Allariz lamenta a perda do seu veciño, e destacan a súa labor como embaixador da vila. "Dende o Concello de Allariz lamentamos profundamente a perda do noso veciño Xosé Manuel Piñeiro (Superpiñeiro) gran embaixador de Allariz e defensor das nosas tradicións e costumes" , sinalan nun comunicado.
Destacan o seu legado nos eidos da comunicación, educación e música que, aseguran "perdurará en todas as veciñas e veciños de Allariz , onde era un mais". Ademais, poñen en valor a súa traxectoria profesional "exemplar", e destacan "o seu compromiso e entrega no exercicio da súa labor, facendo das súas accións un modelo de adicación e responsabilidade".
"A súa presenza entre nós deixou unha pegada que permanecerá nos corazóns de quen o coñeceu, e a súa memoria seguirá viva en Allariz onde sempre será recordado con gran cariño e admiración. A corporación Municipal e a veciñanza de Allariz traslada o seu sentido pésame , apoio e afecto aos seus seres queridos e familia", rematan.