Niñodaguia inaugura este venres o XII Encontro de Cacharreiros con tres xornadas dedicadas á olería tradicional
O Museo de Niñodaguia dará comezo este venres 14 de agosto á duodécima edición do Encontro de Cacharreiros, unha cita dedicada á olería tradicional que reunirá durante tres xornadas a artesáns e visitantes arredor dun dos oficios máis representativos do patrimonio artesanal galego.
O recinto permanecerá aberto do 14 ao 16 de agosto en horario de 11.00 a 14.00 horas e de 17.00 a 21.00 horas, ofrecendo ao público a oportunidade de coñecer de preto o traballo dos oleiros participantes e descubrir as súas creacións.
Nesta edición participarán Carlos Lima, Xana Monteiro, Antón Román, Carlos Sandeclaudio, Susana González, Gonzalo de Buño, Enrique Cabanas, Antía Caldeiro, Belén Agustín Vázquez, Xana Méndez e Diego Ferreiro, que mostrarán as súas técnicas e pezas ao longo do encontro.
A inauguración oficial terá lugar este xoves ás 12.30 horas. Ademais, cada xornada concluirá cunha nova edición do ciclo Atardeceres Musicais, que ofrecerá concertos ás 22.30 horas. Juan (Musgo) abrirá o programa musical o xoves 14, Iria actuará o venres 15 e Xunqueireteiras poñerán o broche final o sábado 16 de agosto.
O XII Encontro de Cacharreiros está organizado por A Moureira de Esmoriz e conta coa colaboración da Xunta de Galicia e da Deputación de Ourense.