Allariz presenta unha nova edición dos Roteiros Temáticos
A Área de Promoción Económica e Turismo do Concello de Allariz presentou unha nova proposta para o ano 2024 dos Roteiros Temáticos: unha serie de visitas temáticas deseñadas para ofrecer unha experiencia única e enriquecedora aos visitantes e residentes por igual.
Na presentación desta iniciativa, que tivo lugar este venres, 12 de abril, estivo presente María López, concelleira de Turismo, quen expresou o súa satisfación pola continuidade desta proposta que promete resaltar a riqueza cultural e histórica de Allariz.
Ademais, na presentación contamos ca presenza de Manuela, a costureira e a señorita Leocadia, que serán parte dalgúns dos Roteiros deste ano. A empresa local Xeitura será a encargada de realizar os Roteiros, mostrando o seu compromiso co desenvolvemento turístico da zona e a calidade das experiencias ofrecidas.
Estas visitas temáticas, programadas para levarse a cabo o terceiro sábado de cada mes, teñen como obxectivo establecerse como unha actividade permanente tras unha primeira edición moi satisfactoria. Cun enfoque na calidade sobre a cantidade, cada grupo estará composto por un máximo de 20 persoas, permitindo unha experiencia máis íntima e significativa. A duración estimada de cada visita será de 90 minutos, con saída e chegada desde o punto de encontro na Oficina Municipal de Turismo, a un custo de 3 euros por persoa sen tarxeta cidadá e 2€ con tarxeta cidadá.
O propósito fundamental destas visitas é dar a coñecer a riqueza do amplo e variado patrimonio de Allariz, tanto aos visitantes como aos residentes locais. Ademais, búscase fomentar que os visitantes pasen polo menos un día en Allariz durante o fin de semana, contribuíndo así ao desenvolvemento económico e turístico.
As visitas temáticas propostas para este ano inclúen:
- Allariz en Tempos do Románico: Un percorrido por Allariz en torno ás súas igrexas máis emblemáticas, Santiago, Vilanova e Santo Estevo, que serán protagonistas deste viaxe á época medieval e románica, mostrando o esplendor de Allariz nese período histórico.
- A Lingua das Bolboretas (Tempos de Guerra): Lembraremos a película e exploraremos as escenas e lugares que foron parte desta produción en Allariz, contextualizando estes momentos nun período histórico crucial.
- Mulleres de Allariz: Un percorrido pola historia da cidade a través das mulleres que deixaron a súa pegada en diferentes ámbitos, destacando a súa fortaleza, sabedoría e loita polos seus ideais, unha visión diferente e enriquecedora da historia local.
- Personaxes Emblemáticas: Un enfoque en figuras ilustres ou significativas para Allariz, explorando lugares clave nas súas vidas ou obras. A identidade destes personaxes revelarase no momento da visita.
Ademais, ofreceranse dous formatos caracterizados:
- Os Museos Cobran Vida: Dúas personaxes relacionadas coa historia de Allariz ofrecerán unha experiencia única nos Museos do Coiro e da Moda, entre outras sorpresas.
- Romasanta de Paseo por Allariz: Manuel Blanco Romasanta regresa para guiar aos visitantes pola cidade, explorando a súa propia historia e os enigmas que aínda hoxe rodean o seu caso xudicial.
Estas visitas temáticas ofrecen unha oportunidade única para descubrir a riqueza cultural e histórica de Allariz, convidando a todos a mergullarse no seu fascinante pasado e presente.