O Ateneo de Ourense proxecta o documental 'A ilusión da abundancia' sobre a loita ambiental de tres mulleres iberoamericanas
O Ateneo de Ourense, en colaboración con Oxfam Intermón, ofrecerá o vindeiro mércores, 23 de setembro, a proxección do documental 'A ilusión da abundancia'. A cita será ás 19.00 horas no salón de actos do Centro Cultural Marcos Valcárcel, situado na rúa do Progreso, número 30, que acolle a sede provisional da entidade.
Trátase dunha produción belga estreada en 2022 e dirixida por Matthieu Lietaert e Erika González Ramírez. A película segue a tres mulleres iberoamericanas, Berta Cáceres (filla), Carolina de Mouro e Máxima Acuña, que comparten un mesmo obxectivo: encabezar a defensa do medio ambiente fronte ao que o documental describe como os conquistadores corporativos modernos.
Segundo plantexa a obra, mentres gobernos e corporacións compiten por conseguir as materias primas máis baratas, estas tres mulleres protagonizan unha historia de valentía e perseveranza. O documental retrata como continúan a súa loita por protexer a natureza mesmo cando a súa propia vida corre perigo.
A presentación da proxección correrá a cargo de Oxfam Intermón, unha das vinte ONG europeas que financiaron o documental.