O BNG da Deputación de Ourense propón derivar 567.500 euros do INORDE a un fondo de colaboración con entidades públicas e privadas

OurenseXa
A formación nacionalista propón crear unha nova liña de axudas para impulsar proxectos económicos e sociais nas comarcas, dentro das emendas aos orzamentos de 2027 do organismo provincial
Xosé Manuel Puga BNG Deputación Ourense
18 Nov 2026

O grupo do BNG na Deputación de Ourense rexistrou unha emenda aos orzamentos de 2027 do INORDE, que será debatida no Consello Reitor do organismo. A proposta, cifrada en 567.500 euros, plantea reorientar esa cantidade cara a unha nova liña de colaboración con entidades públicas e privadas, co obxectivo de impulsar iniciativas de dinamización económica e social no conxunto das comarcas ourensás.

O deputado nacionalista Xosé Manuel Puga presentou a iniciativa aclarando que non supón un cambio de postura da súa formación, que mantén a intención de defender, no pleno provincial previsto para o 3 de decembro, unha emenda aos orzamentos xerais que implicaría a supresión do INORDE como organismo autónomo.

Segundo explicou Puga, a proposta responde a un criterio de eficiencia na xestión dos fondos públicos. O deputado sinalou que non se trata de eliminar as actividades que desenvolve o INORDE, senón de que boa parte delas poderían ser xestionadas directamente pola propia Deputación, sen necesidade de manter unha estrutura independente. Como referencia, citou o caso da desaparición do INLUDES na Deputación de Lugo, cuxas competencias en materia agrogandeira e turística pasaron a integrarse na propia institución provincial.

O BNG considera necesario intervir no funcionamento e nas contas do INORDE mentres non se produce ese cambio. A emenda plantea reducir en 567.500 euros distintas partidas dos capítulos 1, 2, 4 e 6, para habilitar con ese importe unha nova área de gasto baixo a denominación ‘Investimentos e colaboración da Deputación de Ourense con entidades públicas e privadas para o desenvolvemento de actividades e accións de dinamización económica e social na provincia de Ourense’.

Puga explicou que a intención é destinar estes recursos, actualmente asignados a partidas que considera prescindibles ou cunha execución insuficiente, a un fondo que permita traballar xunto ás institucións públicas e ao tecido económico da provincia para promover iniciativas que favorezan a súa activación económica.

En canto ao desglose da emenda, contempla unha redución de 24.000 euros no capítulo 1, correspondente a complementos retributivos ligados a tarefas de secretaría e intervención do organismo; de 316.500 euros no capítulo 2, relativo a gastos correntes; de 122.000 euros no capítulo 4, destinado a transferencias correntes; e de 105.000 euros no capítulo 6, referido a investimentos.

Respecto aos gastos correntes, o BNG xustifica parte dos recortes na baixa execución dalgunhas partidas e na posibilidade de que determinados traballos técnicos sexan realizados por persoal propio da Deputación en lugar de externalizarse. Puga tamén cuestionou o uso de axudas nominativas a concellos e entidades, defendendo que este tipo de colaboracións deberían canalizarse mediante bases reguladoras e procedementos de concorrencia competitiva. “Os concellos e as entidades teñen que poder acceder aos recursos públicos en igualdade de condicións, mediante criterios obxectivos e transparentes, e non depender da vontade discrecional da xerencia ou da presidencia do organismo”, afirmou.

En relación co capítulo 6, o deputado explicou que a redución proposta responde á baixa execución que de forma reiterada presentan as partidas de investimento do INORDE.

Puga cuestionou igualmente o modelo de funcionamento do organismo e apuntou que existen aspectos da súa estrutura e dos seus gastos que deberían revisarse. Neste sentido, a retribución da xerencia do INORDE é un dos elementos sinalados polo BNG como merecedor de revisión, dentro dun cuestionamento máis amplo sobre o funcionamento e os custos da estrutura administrativa do organismo.

O deputado nacionalista insistiu en que a emenda presentada constitúe unha proposta construtiva orientada a modificar o destino dos recursos públicos e a achegar a actividade do INORDE aos fins recollidos nos seus propios estatutos, centrados na “promoción, o desenvolvemento e a mellora das condicións económicas e sociais da provincia”.

0.18371891975403