O BNG denuncia a parálise do proxecto do edificio administrativo da Xunta en Ourense
O deputado do BNG por Ourense no Parlamento galego, Iago Tabarés, e o portavoz municipal da formación, Luís Seara, compareceron este mércores para poñer o foco na situación do proxecto destinado a construír un novo edificio administrativo da Xunta na cidade. Segundo advertiron, a iniciativa atópase nun punto de “parálise” e sen información pública actualizada.
Seara abriu a comparecencia lembrando que se trata dun proxecto “aprobado xa no ano 2021 pero do cal, desde entón a hoxe pouco ou nada se sabe”. O portavoz municipal fixo referencia a unha recente sesión da Xunta de Área de Urbanismo do Concello, na que, segundo explicou, o concelleiro delegado respondeu cun “non sabemos nada” ao ser preguntado pola cuestión. Para o edil nacionalista, esta resposta “define claramente a incertidume que existe a respecto deste edificio”, o que, segundo indicou, xera numerosas dúbidas sobre o seu futuro.
Co obxectivo de obter explicacións, o BNG rexistrou unha serie de iniciativas no Parlamento galego. Tabarés asegurou que a súa formación leva tempo reclamando información sobre este asunto, sinalando que “o que facemos desde o BNG é volver á carga pois levamos presentado ao longo deste e da anterior lexislatura moitas preguntas e iniciativas para coñecer os pormenores dun proxecto do cal apenas sabemos nada”.
O deputado fixo ademais un repaso histórico do proxecto, que cualificou como unha sucesión de promesas incumpridas. “Esta é unha acumulación sucesiva de máis de 30 anos de promesas incumpridas. É un exemplo de planificación cero por parte da Xunta de Galiza”, afirmou, ao tempo que criticou o gasto de recursos públicos en adquisición de parcelas e alugueiros de sedes administrativas.
Na súa intervención tamén lembrou anuncios realizados en etapas anteriores de goberno autonómico, que non chegaron a materializarse, e puxo o foco en decisións máis recentes, como a compra de varias parcelas en 2020 sen que, segundo indicou, existise unha definición clara do proxecto.
Segundo explicou Tabarés, en setembro de 2023 adxudicouse a redacción do proxecto, cun prazo estimado de seis meses, pero a día de hoxe “non hai proxecto, non hai licenza, non hai absolutamente nada”.
Ante esta situación, o BNG reclama á Xunta que aclare o estado actual da iniciativa, que determine se os terreos adquiridos son axeitados e, no caso contrario, que explique que alternativas se están a valorar. Tamén esixen un calendario concreto para a aprobación do proxecto e a licitación dunha obra que, segundo lembraron, está valorada en 24 millóns de euros.
Tabarés advertiu das dúbidas existentes sobre a viabilidade técnica da localización proposta e reclamou “respecto á cidadanía ourensá, respecto a Ourense, respecto aos recursos públicos e que se dote a Ourense dese edificio administrativo que se demandaba hai dous séculos pois nin Ourense nin a veciñanza merecemos este trato”.