O BNG propón un metro lixeiro para conectar Ourense coa súa contorna

OurenseXa
A formación aposta por un sistema ferroviario semellante a unha rede de cercanías que conectaría máis de 170.000 persoas da cidade e dos concellos próximos, e propón ademais trasladar a estación de mercadorías a San Cibrao
BNG Noa Presas metro lixeiro
20 Nov 2026

A candidata do BNG ao Congreso por Ourense, Noa Presas, presentou unha proposta para pór en marcha un metro lixeiro que conecte a cidade cos concellos da súa contorna, dentro do programa electoral de cara aos comicios do 29 de novembro.

Segundo explicou, tratariase dun sistema de transporte semellante a unha rede de cercanías ferroviarias, capaz de dar servizo a máis de 170.000 persoas entre a capital ourensá e as localidades próximas. A iniciativa busca facilitar os desprazamentos diarios e mellorar o acceso a puntos considerados clave, como os centros sanitarios, o campus universitario e as principais zonas industriais.

De acordo coa proposta, a rede permitiría enlazar O Carballiño con puntos como Santa Cruz, Quintela, Untes, O Pino, a Estación do Empalme, o campus universitario, o polígono industrial, San Francisco e a Residencia, ademais de conectar con outras localidades como Ribadavia, Barra de Miño, Os Peares ou Baños de Molgas.

Presas defendeu que esta infraestrutura suporía un cambio de modelo na mobilidade da provincia, ao reducir a dependencia do vehículo privado e ofrecer unha alternativa de transporte “moderna, sustentábel e adaptada ás necesidades da cidadanía”. Nas súas palabras, Ourense precisa “deixar atrás a resignación” e apostar por infraestruturas “á altura” do que, ao seu xuízo, merece o territorio.

A candidata vinculou esta proposta á necesidade de contar con representación nacionalista no Congreso pola circunscrición de Ourense, algo que o BNG non logrou ata agora. Segundo argumentou, só cun deputado ou deputada propios poderían impulsarse con forza iniciativas coma esta, que considera que quedaron á marxe da axenda doutras forzas políticas nas últimas décadas.

Alén do proxecto de mobilidade, Presas comprometeuse a pór enriba da mesa, no Congreso, o traslado da estación de mercadorías ferroviaria a San Cibrao. A candidata situou esta proposta no contexto do que considera unha oportunidade para que a provincia conte cunha voz propia que defenda os seus intereses, incluíndo o impulso á industria xa instalada nos polígonos ourensáns e a atracción de novos investimentos.

0.17916798591614