Infraestructuras

As dúas actuacións buscan adaptar as instalacións ao aumento de deportistas e público, con obras no campo de fútbol, o graderío, a iluminación e os vestiarios

O Concello do Carballiño pon en marcha dous proxectos moi reclamados no barrio da Uceira, cun investimento conxunto próximo ao millón de euros. Por unha banda, levarase a cabo a ampliación e o acondicionamento do complexo deportivo, coa finalidade de axustar o recinto ao incremento de xogadores e espectadores rexistrado nos últimos anos. Por outra, construiranse novos vestiarios e reformarase o pavillón da Uceira, un espazo que tamén emprega o alumnado do CEIP Calvo Sotelo.

O alcalde en funcións e responsable da área de Deportes, José Castro-Gil, sinalou que ambas as intervencións son fundamentais para seguir promovendo a práctica deportiva e a actividade física entre a xente máis nova, e insistiu na necesidade de poñer ao día unhas instalacións que, ao seu ver, teñen gran proxección para o municipio. Neste sentido, lembrou que o complexo acolleu este verán o Campus Experience do Real Madrid, a primeira edición deste programa que se celebrou en toda Galicia.

Ampliación do campo e novo graderío

A reforma das instalacións deportivas ten un custo aproximado de 490.000 euros, a metade dos cales serán financiados pola Xunta de Galicia. Os traballos inclúen a ampliación do actual campo de fútbol sete e a construción dun novo graderío capaz de acoller a maior afluencia de público. Tamén se mellorarán a rede de drenaxe, os pavimentos, o rego e a iluminación do terreo de xogo, ademais de renovar equipamentos como as porterías fixas, os banderíns, os bancos de xogadores ou as redes de protección dos fondos. O prazo previsto para rematar esta obra é de oito meses.

Obras no pavillón

A segunda actuación, desenvolvida a través dun convenio coa Consellería de Educación, suporá un investimento de 500.000 euros e contempla a construción de vestiarios e o acondicionamento interior do pavillón da Uceira. Con esta reforma integral preténdese ofrecer maior comodidade tanto ao alumnado do centro escolar como aos diferentes equipos que utilizan o espazo, favorecendo ademais que se poidan desenvolver máis actividades nas súas instalacións.