O CEIP Calvo Sotelo do Carballiño acolle un obradoiro de primeiros auxilios dentro dun programa que xa formou a máis de 9.000 escolares de Ourense

O CEIP Calvo Sotelo do Carballiño acolleu esta semana o obradoiro de primeiros auxilios e educación para a saúde ‘Pupas, sustos e outros desgustos’, un programa que, dende a súa posta en marcha no curso 2017-2018 precisamente na comarca do Carballiño, conseguiu formar xa a máis de 9.000 nenos e nenas de toda a área sanitaria de Ourense.
Trátase dun programa de intervención comunitaria impulsado por Atención Primaria, pensado especificamente para estudantes de 3º e 4º de Educación Primaria, con idades comprendidas entre os 8 e os 10 anos. Nado nos centros escolares da comarca carballiñesa, co paso dos anos foise estendendo a toda a zona sanitaria, incluíndo tamén Verín e O Barco de Valdeorras.
O seu obxectivo é ensinar aos máis pequenos a xestionar de forma práctica as emerxencias que poden xurdir no día a día, empregando para iso metodoloxías lúdicas e dinámicas participativas que facilitan que os coñecementos adquiridos perduren no tempo.
O obradoiro ten unha duración de dúas horas e estrutúrase en dous módulos. O primeiro deles aborda o que se definen como “pupas e sustos de cada día”, é dicir, situacións habituais como a febre, a diarrea e os vómitos, os golpes e hematomas, as feridas, os cortes, o sangrado nasal, a presenza de substancias nos ollos ou as queimaduras, ademais de incluír recomendacións xerais para manter bos hábitos de saúde.
O segundo módulo céntrase nos “sustos e grandes desgustos”, episodios de maior gravidade. Neste bloque oriéntase aos escolares para que saiban identificar este tipo de situacións e explícaselles a importancia de avisar aos servizos sanitarios, así como o procedemento para facelo. Tamén se traballa o recoñecemento de cadros como unha convulsión ou a perda de consciencia dunha persoa, e a forma correcta de actuar ante eles.
A actividade combinou unha breve proxección inicial con explicacións teóricas e, a continuación, exercicios prácticos realizados en grupo, de xeito que a aprendizaxe resultase próxima e adaptada á idade do alumnado.
Grazas á continuidade desta iniciativa e á implicación tanto do persoal de enfermaría de atención primaria como dos propios colexios, miles de escolares da provincia adquiriron ao longo destes anos nocións básicas que, en determinadas circunstancias, poden resultar decisivas á hora de actuar ante unha emerxencia.