'O censor de monstros' chega ao Pereiro de Aguiar o 27 de outubro
O Concello do Pereiro de Aguiar será escenario, o vindeiro martes 27 de outubro, dunha nova sesión de contacontos dirixida ao público familiar. A actividade, titulada 'O censor de monstros', terá lugar ás 18.30 horas no Salón de Actos dos Gozos.
O espectáculo correrá a cargo da compañía Barafunda Animación, que propón unha narración na que os monstros e as historias fantásticas se converten no eixo central da función, combinando diversión e imaxinación para os asistentes.
A iniciativa enmárcase na colaboración entre o Concello do Pereiro de Aguiar, a Deputación de Ourense e a reaOU (Rede de Auditorios Provincial de Ourense), entidades que organizan e respaldan conxuntamente esta proposta cultural dirixida a achegar as artes escénicas aos distintos concellos da provincia.