O Centro Cultural Marcos Valcárcel inaugura a II exposición internacional de Art Brut “Al Cubo”
O Centro Cultural Marcos Valcárcel acolle desde este xoves a segunda edición da exposición internacional “Al Cubo”, unha proposta impulsada pola Deputación de Ourense que pon o foco no valor social da arte e na súa capacidade para fomentar a inclusión.
O vicepresidente segundo e deputado de Cultura, César Fernández, foi o encargado de inaugurar a mostra, destacando o papel do art brut “como ferramenta de expresión, inclusión e benestar social”. Durante a súa intervención, subliñou tamén que a iniciativa “é un exemplo claro de como a cultura pode ser un vehículo de integración e de dignificación das persoas, ofrecendo espazos onde a creatividade flúe libremente, sen etiquetas nin límites impostos”.
A exposición reúne obras procedentes de diferentes proxectos e entidades de ámbito internacional, entre elas Andar de Nones, con sede en Zaragoza, Alpha Cultures, de Francia, e ArtEspida, vinculada ao Hospital de Piñor, en Galicia. Todas elas comparten unha liña de traballo centrada en facilitar procesos creativos a persoas con diversidade funcional ou en contextos relacionados coa saúde mental.
Máis alá do resultado artístico, “Al Cubo” propón unha experiencia que pon o acento no proceso creativo e na conexión das persoas coas súas emocións e co seu entorno. As obras expostas reflicten así perspectivas únicas, nacidas da liberdade expresiva e do acompañamento profesional, nun contexto que favorece o benestar emocional e a interacción social.
Os proxectos participantes desenvolven, ademais, talleres e espazos de creación orientados a fomentar a autonomía persoal, o intercambio de experiencias e a construción da identidade a través da arte. Este enfoque contribúe a combater estigmas asociados á saúde mental e á diversidade funcional.
Con esta iniciativa, a Deputación de Ourense reforza o seu compromiso cunha cultura “accesible, aberta e capaz de chegar a todos os colectivos, especialmente aos máis vulnerables”, ao tempo que impulsa propostas que combinan valor artístico e impacto social.
A exposición poderá visitarse ata o vindeiro 16 de maio, consolidándose como un espazo de encontro entre arte, comunidade e saúde, e contribuíndo a situar Ourense como referente en proxectos culturais de carácter social e innovador.