O Centro Cultural Marcos Valcárcel inaugura “De pupila a pupila”, a nova exposición de Gonzalo Eiriz
O Centro Cultural Marcos Valcárcel acolle desde este mes a exposición “De pupila a pupila”, do artista Gonzalo Eiriz, unha proposta de arte contemporánea centrada na percepción, a memoria colectiva e as tensións da sociedade actual.
A mostra reúne diferentes pezas elaboradas con materiais como metal, plástico, PVC, cristal, metacrilato e pintura esmaltada, nun traballo no que o artista explora a reutilización de elementos industriais e a creación de estruturas que se moven entre a orde e o caos.
A través desta proposta, Eiriz constrúe unha reflexión arredor da identidade contemporánea e das transformacións da sociedade postindustrial, reinterpretando os relatos da modernidade desde unha perspectiva marcada pola fragmentación e a experimentación espacial.
O percorrido expositivo incorpora referencias a correntes como a abstracción postpictórica, o construtivismo ruso, o dadaísmo ou a arte cinética, configurando unha linguaxe visual baseada na colaxe matérica e no carácter procesual da creación artística. As pezas preséntanse como “artefactos existenciais” que transforman materiais industriais e obxectos fragmentados en novas narrativas visuais.
“De pupila a pupila” propón tamén unha experiencia participativa, na que o público pasa de ser un mero observador a integrarse na propia obra, establecendo unha relación directa entre espazo, emoción e percepción.