O cine vinculado a Ourense volve ao OUFF con dez propostas na sección Made in OU
O OUFF · Ourense Film Festival volve dedicar un espazo propio ao talento cinematográfico ligado á provincia coa presentación do programa de Made in OU, a sección centrada nas producións de selo ourensán. Máis alá de funcionar como escaparate da creación local, esta 31ª edición propón un percorrido por diferentes xeracións, xéneros e estilos narrativos, combinando ficción, documental, memoria, identidade, tradición e cine de acción nunha proposta variada.
Todas as proxeccións terán lugar no Cineclube Padre Feijóo, consolidando así o vínculo do festival cun dos espazos de referencia da exhibición cinematográfica na cidade. A sección estará coordinada, por segundo ano consecutivo, polo cineasta ourensán Rubén Méndez, encargado de presentar as sesións e de propiciar o diálogo entre as obras, o público e os seus autores.
Catro días de programación
A sección desenvolverase ao longo de catro xornadas, do martes 29 de setembro ao venres 2 de outubro, distribuídas en diferentes bloques temáticos.
A apertura, o 29 de setembro, corresponde ao documental 'Todo pode esperar', dirixido por Borja Casal e protagonizado por César Morán, recoñecido co I Premio José Gil ao Mellor Guión Documental da Deputación da Coruña e xa exhibido pola Filmoteca de Galicia. A obra aborda a vocación, o paso do tempo e as segundas oportunidades a partir dun proxecto musical que tardou cinco décadas en facerse realidade.
O 30 de setembro a xornada xirará arredor da memoria e o territorio, con tres documentais: 'Ferrín Arraiano', de Aser Álvarez, centrado na figura de Xosé Luís Méndez Ferrín e na raia seca; 'Mulleres en Parada de Sil', de Sabela Rodríguez, que retrata a distintas xeracións de mulleres desta comunidade rural; e 'Cando o vento arde', de Alfonso Arturo Álvarez, gravado con teléfono móbil durante os incendios da Estación de Montaña de Manzaneda.
O 1 de outubro, a tradición e a identidade abordaranse desde diferentes rexistros: o thriller 'O Felo', de Suso Costa, que converte a unha figura destacada do Entroido de Maceda en protagonista dunha trama de suspense; 'As mans da pulpeira', de Silvia Cachafeiro, rodada no Carballiño como homenaxe ao traballo e á solidariedade entre mulleres na Galicia dos anos cincuenta; e 'El silencio de Allen Robert Angelo', de Marzo Lozano, retrato pausado dun home que decide vivir illado nas montañas galegas.
A sección pecharase o 2 de outubro con propostas de ficción de ton máis enérxico: 'Dopamina Zero', de Rodrigo Marini, rodada no Barco de Valdeorras e protagonizada por Juan José Ballesta, Veki Velilla e Cristina Mediero; a comedia criminal 'Dos Gardenias', de Juan Hervella-Rego, sobre dúas anciás enfrontadas a un cártel mafioso; e 'Robó y ganó', de Aldán Michinel, un peche de ton irreverente dentro do xénero criminal.
Con esta selección, Made in OU volve poñer de manifesto a variedade do cine feito desde a provincia, amosando que o audiovisual ourensán abarca hoxe múltiples miradas e formas de contar historias. A 31ª edición do OUFF · Ourense Film Festival celebrarase do 25 de setembro ao 4 de outubro.