O Concello da Peroxa fai pública a programación de Nadal
O Concello da Peroxa vén de facer pública a programación para este Nadal de 2024, que contará con preto dunha decena de actividades destinadas ao público de todas as idades.
O programa arrancará o vindeiro domingo, 14 de decembro, coa celebración da II Concentración Solidaria de vehículos no recinto feiral da Peroxa, e na que cada participante aportará un mínimo de cinco quilos de alimentos que serán repartidos entre os máis necesitados.
As actividades continuarán o 19 de decembro ás 18.00 horas no Auditorio Municipal cunha función a cargo dos membros de ASPANAS, e a chegada de Papá Noel ao concello, o domingo 22 de decembro. O mesmo día haberá tamén unha actuación musical a cargo do Grupo de Acordeóns Bieito Blanco, que dará un concerto ás 20.30 horas no Auditorio Municipal.
O 26 de decembro, os máis pequenos do concello poderán participar nunha excursión a Pazolandia, e o 28 de decembro terá lugar o Concerto de Nadal, que será ás 18.00 horas no Auditorio Municipal a cargo de Poli Marchoso.
Pola súa banda, o 29 de decembro, ás 18.00 horas no Auditorio, haberá un Concerto de Corais coa participación de Rondalla Xuntaza dos Pobos, Coral Encantiño e Coral Os Trinos.
Para rematar, o sábado 4 de xaneiro ás 18.30 terá lugar a función infantil ‘Pepa Loba’.
Ademais, dende o Concello lembran xa está aberta a inscrición para anotarse ao campamento de Nadal deste ano que se desenvolverá entre o 23 de decembro e o 4 de xaneiro.