O Concello de Ourense prevé adxudicar o contrato do servizo de recollida de residuos e limpeza viaria antes de abril
A unión temporal de empresas formada pola ourensá COPASA e Setec Building sitúase como a principal candidata para asumir o servizo de recollida de residuos e limpeza viaria do Concello de Ourense tras presentar a proposta máis vantaxosa no proceso de licitación.
Este luns reuniuse a mesa de contratación municipal para proceder á apertura das ofertas económicas do concurso. Nesa sesión comprobouse que a UTE COPASA–Setec Building rexistrou a maior baixa económica, cun 6,15 %, o que supón preto dun millón de euros de aforro anual respecto ao prezo de licitación. A súa oferta ascende a 13.839.013,55 euros máis IVE ao ano, situándose claramente por diante das demais propostas presentadas.
A seguinte oferta máis competitiva foi a da UTE formada por Valoriza Servicios Medioambientales, Ingeser Atlántica e Promotora y Desarrolladora Mexicana de Infraestructura, cunha baixa do 3,72 %. Por detrás quedaron as propostas de Extraco–Rede Ambiente e Acciona–OPI, con reducións inferiores ao 3,2 %.
Tras a análise conxunta das propostas técnicas e económicas, a UTE liderada por COPASA perfílase como a gañadora do concurso, ao ser a mellor valorada en ambos apartados. A actual concesionaria do servizo, na que COPASA participa xunto con FCC, quedou fóra do proceso por un erro na súa oferta.
O novo contrato, que terá vixencia ata o ano 2036, podería quedar adxudicado antes do mes de abril de 2026. Desde o goberno municipal sinalan que “sen dúbida haberá unha mellora inmediata do servizo, que será aínda maior dentro de 14 meses, cando cheguen a nova maquinaria e novos camións”. Ademais, avanzan que o proceso para a renovación dos colectores está a piques de resolverse noutro concurso, polo que os novos recipientes poderán estar operativos nun prazo aproximado de cinco meses.