O Concello ordenará o traslado dos comerciantes á Praza de Abastos “nos próximos días”
O alcalde de Ourense, Gonzalo Pérez Jácome, manifestou esta mañá que “o Concello de Ourense non dilatará máis o traslado da mercantil que rexenta a concesión da Praza de Abastos da Alameda", e que lamenta, di, “ter confiado no conselleiro de Emprego, Comercio e Emigración, José González, e no seu equipo” que, segundo él, “nos últimos meses nos enredaron con negociacións a 3 bandas que so pretendían complicar e dilatar o traslado”.
Dende o Concello procederase “coa máxima dilixencia a solucionar a situación da Praza de Abastos”, sinalan nun comunicado, no que eluden responsabilidades pola situación e acusan aos anteriores rexedores da cidade de ter bloqueada a situación.
“Nos próximos días se lle notificará á mercantil da praza que proceda ao necesario para o traslado ao edificio reformado, que xa está totalmente recepcionado”, asegura o alcalde, que explica que “disporán duns meses para trasladarse e liberar así as instalacións actuais no parque da Alameda”.
O Concello de Ourense, di o comunicado, “non será responsable dos gastos da relocalización, como así se asinou no acordo de 2018 entre as dúas partes”. Ademais, o reloxo da concesión volverá contar cando se reinstalen no edificio, xa que actualmente está parado, e volverán estar obrigados a pagar alugueiro mensual, xa que actualmente a mercantil da praza paga 0 euros de canon”. “Estas condicións tan vantaxosas para a empresa concesionaria da Praza de Abastos, asináronse polo entón alcalde Jesús Vázquez e a mercantil, para compensar os trastornos do traslado provisional e consecuentemente retorno”, sinala o actual alcalde.
Para Jácome “é curioso que se lle suspendese o alugueiro e o prazo do contrato para compensar”. Segundo el, “pouco hai que compensa” porque, di, “no parque da Alameda incrementaron as ventas”.
O alcalde mantén que a mercantil “non quere volver ao edificio da Praza por 3 motivos: porque non pagan alugueiro, porque a data da caducidade da concesión está parada e porque comercialmente venden máis ao estar nun parque do centro, a pé de beirarrúa e parada de autobús e con ascensor de entrada e saída de aparcamento”.
Explica que o Concello xa tiña tomada esta decisión hai tempo, e acusa á Xunta de Galicia a tela retrasado tras emprazar o Concello a manter unhas negociacións para tratar de consensuar solucións coa concesionaria que xestiona a praza. Estas negociacións, segundo Jácome, "resultaron un engano e só serviron para perder un ano de tempo, dado que ao final a outra parte non cedeu nin un centímetro".