O Coro do Canto da cidade francesa de Quimper chega ao Auditorio este venres
O Auditorio Municipal de Ourense acollerá este venres 24 de abril, ás 20.00 horas, a representación do espectáculo “Canto Xeral”, unha proposta musical baseada en textos de Pablo Neruda e musicada por Mikis Theodorakis. A entrada será gratuíta ata completar o aforo.
A actuación estará a cargo do Coro do Canto da cidade francesa de Quimper, irmandada con Ourense, que visita a capital ourensá dentro do marco de colaboración cultural entre ambas cidades. O concerto conta coa colaboración do Concello de Ourense, que cede o Auditorio Municipal para o desenvolvemento desta actividade.
O coro está formado por arredor de corenta integrantes e estará acompañado por piano e percusións, baixo a dirección de Pierre-Emmanuel Clair. A obra que interpretarán é unha composición de carácter épico que adapta o poemario de Neruda, centrado na historia, os conflitos e os destinos dos pobos de América.
A música de Theodorakis acompaña estes textos cunha gran riqueza expresiva, alternando momentos de intensidade, emoción e lirismo, nunha interpretación que busca transmitir tanto a forza como a sensibilidade da obra orixinal.