O delegado do Goberno destaca o programa Ineco RuralTIC como unha aposta polo futuro do rural a través da dixitalización
O delegado do Goberno en Galicia, Pedro Blanco, visitou este xoves o concello de Maceda para coñecer de primeira man o desenvolvemento do programa Ineco RuralTIC, unha iniciativa que cualificou como “unha aposta polo futuro do rural a través da dixitalización”.
Durante a súa estancia, Blanco participou nun taller no IES San Mamede centrado no impulso das vocacións STEAM, acompañado pola alcaldesa, Uxía Oviedo, o subdelegado do Goberno en Ourense, Eladio Santos; a responsable territorial de Ineco en Galicia, Noemí Romero, así como voluntarios da entidade e membros da comunidade educativa.
No acto, o delegado puxo en valor este tipo de programas por achegar coñecemento e innovación aos concellos de menor tamaño e contribuír ao seu desenvolvemento. Tamén tivo palabras de recoñecemento para os profesionais participantes, destacando o traballo dos voluntarios desprazados a Maceda, aos que agradeceu o seu compromiso “co territorio e coas persoas”.
Desde o pasado 14 de abril, estes profesionais desenvolven o seu labor como nómades dixitais na localidade, combinando o teletraballo coa impartición de obradoiros dirixidos á veciñanza, ao alumnado e ao tecido empresarial local. As actividades inclúen formación en programación, uso de aplicacións e competencias dixitais, así como apoio a pequenas empresas.
Un dos eixos principais do programa en Maceda está centrado na infancia e na mocidade. Neste sentido, Pedro Blanco incidiu na relevancia de promover a capacitación dixital entre as novas xeracións dos concellos rurais, subliñando que “son o futuro do rural galego”. Ademais, lembrou que unha das prioridades do Goberno é garantir a igualdade de oportunidades, o que pasa por reducir a fenda dixital tanto territorial como xeracional.
O programa Ineco RuralTIC acumula xa máis de 1.600 asistencias nas súas catro edicións en Galicia, con participación de 56 pequenas e medianas empresas e presenza en máis de vinte concellos. Na provincia de Ourense rexistráronse arredor de 700 participacións, das que máis de 160 corresponden ao municipio de Maceda. A iniciativa continuará o seu percorrido en Silleda durante o mes de maio e na Pontenova en xuño.
Pedro Blanco reafirmou o respaldo do Goberno a este tipo de proxectos, que “conectan talento e territorio e contribúen a construír un rural máis dinámico e con máis futuro para Galicia”.
Ineco RuralTIC é un programa de voluntariado corporativo impulsado por Ineco, empresa pública dependente do Ministerio de Transportes e Mobilidade Sostible, que leva profesionais a concellos rurais de menos de 10.000 habitantes para teletraballar desde eles mentres ofrecen formación en competencias dixitais á poboación e ás pemes locais.