O Festival EmularT achega a Barbadás un concerto de frauta e guitarra que viaxa do clásico ao jazz
O Festival EmularT celebra este luns 13 de xullo unha nova proposta musical en Barbadás coa actuación de “Entre dúas músicas: clásico e jazz”, un concerto protagonizado pola frauta e a guitarra que permitirá percorrer diferentes estilos a través de obras orixinais e transcricións.
A cita terá lugar ás 20:00 horas no Museo da Gaita de Fole, en Sobrado do Bispo, e amosará a versatilidade destes dous instrumentos a través dun repertorio que abrangue desde a música clásica ata o jazz.
O concerto forma parte da terceira edición do Festival EmularT, unha iniciativa que busca impulsar a creación artística e achegar distintas disciplinas culturais ao municipio de Barbadás.
A programación do festival continuará ata o sábado 18 de xullo cun calendario de actividades que pretende consolidar esta cita como unha das propostas culturais do verán no concello.