O Festival EmularT ofrece este martes un concerto compartido entre MID Sound e Trío Rousinol
O Festival EmularT continúa este martes 14 de xullo coa proposta Concertos Compartidos, unha cita que reunirá no mesmo escenario ás agrupacións MID Sound, do Conservatorio de Música de Ourense, e Trío Rousinol, do Real Conservatorio Superior de Música de Madrid.
O concerto celebrarase ás 19.00 horas na Igrexa de Sobrado do Bispo e ofrecerá un repertorio interpretado por acordeóns, violín e guitarra.
MID Sound é unha formación creada en 2024 por iniciativa da profesora Celia Adrián. Desde a súa creación, o grupo conseguiu premios en distintos concursos nacionais de acordeón.
Pola súa banda, Trío Rousinol está integrado por estudantes que coinciden na aula do catedrático Esteban Algora. A formación recupera un formato instrumental que se remonta á década dos anos sesenta e que tivo a súa orixe co acordeonista checo Milan Bláha.
Este concerto forma parte da programación da terceira edición do Festival EmularT, que continúa ao longo da semana con distintas propostas culturais en Barbadás.