O festival EmularT ofrecerá 13 propostas culturais entre Sobrado do Bispo e Barbadás na súa terceira edición
O Concello de Barbadás colabora un ano máis co festival EmularT de Sobrado do Bispo, unha iniciativa que alcanza a súa terceira edición cunha programación formada por 13 actividades culturais que se desenvolverán entre os días 10 e 18 de xullo.
O proxecto, promovido pola propia veciñanza da parroquia, amplía nesta edición o seu alcance territorial e desenvolverá actividades non só en Sobrado do Bispo, senón tamén no núcleo de Barbadás. Entre as novidades destaca a incorporación do Museo da Gaita de Fole como un dos espazos que acollerán propostas do festival.
Durante a presentación do evento, o alcalde de Barbadás, Xosé Carlos Valcárcel, destacou a importancia dunha iniciativa que reúne cada ano tanto a veciñanza como visitantes e que aposta pola descentralización da oferta cultural. O rexedor puxo en valor o papel deste tipo de proxectos no ámbito rural e lembrou a tradición cultural existente en Sobrado.
Pola súa parte, o concelleiro de Cultura, José Manuel Morgade, agradeceu o traballo desenvolvido pola organización e destacou a ampliación da programación a outros espazos do municipio, reiterando o apoio do Concello ás futuras edicións.
O director artístico do festival, Rafael Yebra, tamén agradeceu a colaboración institucional e incidiu na evolución experimentada polo proxecto desde a súa creación. Segundo explicou, o crecemento do festival responde ao traballo das persoas implicadas, ao apoio recibido e á diversidade da oferta cultural proposta, destacando ademais a importancia de visibilizar as posibilidades que ofrece o medio rural.
A programación incluirá concertos de distintos estilos musicais, desde música clásica e de cámara ata jazz, pop-rock ou propostas tradicionais, ademais de exposicións e actividades formativas.
O festival abrirá o venres 10 de xullo ás 20.00 horas coa actuación da Banda de Gaitas e Escola Nova Fronteira no Parque do Fidalguiño. A xornada completarase ás 22.30 horas coa proxección da película 'Rondallas' no mesmo espazo.
O sábado 11 de xullo, a igrexa de Sobrado acollerá ás 21.00 horas o concerto de música clásica do Cuarteto de Corda 'Dumka'. O domingo 12 actuarán as cantareiras e pandereteiras de Vagalumes na Praza de San Xoán ás 12.00 horas e, xa pola tarde, o cómico Xavier Vieiras ofrecerá un monólogo no Bar Nani a partir das 21.00 horas.
O luns 13 de xullo terá lugar no Museo da Gaita de Fole de Barbadás un concerto de música clásica e jazz a cargo de Zukhra Zeingaliyeva e Oswaldo Oro ás 20.00 horas. Ao día seguinte, ás 19.00 horas, será a quenda do concerto do Trio Rousinol + Mid Sound na igrexa de Sobrado.
A programación continuará o mércores 15 coa representación teatral da compañía 'A Run Run' no Campo do Carril ás 19.00 horas. O xoves 16, ás 22.00 horas, o Museo da Gaita de Fole acollerá unha sesión de proxección de curtametraxes organizada por Zinemusik Produccións.
A música volverá ter protagonismo o venres 17 de xullo coa actuación de Somoza Trio no Parque do Fidalguiño ás 21.00 horas. O peche musical chegará o sábado 18 coa actuación da Xove Orquestra Ourensanía, acompañada por María Mendoza e Rafael Yebra, nun concerto previsto para as 20.00 horas.
Paralelamente, entre o 10 e o 18 de xullo poderán visitarse distintas exposicións repartidas entre o local multiusos da rúa Xisterna e o local da Antiga Escola. A programación expositiva incluirá gravados de Leonardo Rial e Xan Leiras, esculturas de Andrés Conde e José López, pinturas de Pilar Seara e Diana Moreda e mostras de arte popular de Encarna García e Carmen Seara.
Ademais, entre os días 13 e 18 de xullo desenvolveranse diferentes obradoiros relacionados co arte urbano contemporáneo, gravado, escultura en madeira, pintura e graffiti, dirixidos a fomentar a participación e a creatividade entre persoas de diferentes idades.