O Festival Internacional de Curtas de Comedia RiR presenta a súa nova imaxe para a edición de 2026
O Festival Internacional de Curtas de Comedia RiR xa conta coa imaxe oficial da súa edición de 2026, un cartel deseñado pola ilustradora Alba Cantalapiedra, coñecida nas redes sociais como @albaricoque_acg.
Cantalapiedra, nada en Valladolid en 1996 e afincada en Ourense, é graduada en deseño gráfico e desenvolveu a súa carreira profesional no ámbito da ilustración. A creadora conta con experiencia en axencias como McCann ou Microbio Comunicación e decidiu posteriormente centrar a súa actividade profesional na ilustración.
Ao longo da súa traxectoria realizou proxectos para diferentes marcas, editoriais e empresas do sector musical, entre elas Coca-Cola, Penguin Random House, Grupo Planeta, Nocturna Ediciones ou Warner. Ademais, publicou o seu primeiro libro coa editorial Lunwerg en 2021.
A nova proposta gráfica do RiR presenta unha temática vinculada ao mundo do cinema, coa presenza de bobinas de películas como elemento principal do cartel. Esta imaxe será tamén o punto de partida dos contidos e grafismos que o festival comezará a difundir nas súas redes sociais nos próximos días, iniciando a conta atrás para unha nova edición dedicada ao cinema breve e ao humor.
A novena edición do Festival Internacional de Curtas de Comedia RiR recibiu nesta convocatoria un total de 213 curtametraxes de comedia procedentes de diferentes países, unha cifra que confirma a evolución e a dimensión internacional do certame.
A programación comezará o domingo 30 de agosto ás 20.00 horas coa proxección do palmarés da edición anterior. A sesión, aberta ao público e de entrada gratuíta, terá lugar na Casa da Cultura de Allariz e permitirá recuperar as obras premiadas na pasada edición ou coñecelas por primeira vez.
O Festival RiR continúa así coa súa consolidación como unha cita de referencia para creadoras, creadores e público interesado na comedia, convertendo durante unha semana a vila de Allariz no punto de encontro do cinema breve e o humor.
O certame conta co apoio do Concello de Allariz e da Deputación de Ourense como financiadores, así como co patrocinio principal de Aira Editorial.