O Festival Ou Yeah! arranca con éxito en Expourense e reúne milleiros de persoas
A segunda edición do Festival Ou Yeah! botou a andar por todo o alto en Expourense, onde milleiros de persoas se deron cita para gozar dunha intensa xornada de música en directo e gastronomía de proximidade. O evento confirmou o éxito do seu formato expandido e consolidouse como unha das grandes citas culturais do verán na provincia de Ourense.
Desde a apertura de portas, o recinto encheuse dun público de diferentes xeracións que compartiu a súa paixón polo rock nun ambiente festivo e cómodo. A organización destacou a excelente resposta dos asistentes e o bo desenvolvemento dunha xornada que combinou música, convivencia e unha coidada oferta gastronómica.
O apartado musical contou coa participación de tres propostas moi diferentes que lograron conectar co público. Os británicos Kitty, Daisy & Lewis abriron os concertos cun directo marcado polos sons do blues, o soul e o rock and roll máis clásico, conquistando aos asistentes coa súa enerxía sobre o escenario.
Un dos momentos máis agardados chegou coa actuación de Loquillo, que recalou en Ourense coa súa xira "Corazones Legendarios". O veterano artista repasou algúns dos grandes éxitos da súa carreira nun concerto que reuniu varias xeracións de seguidores e que confirmou o seu peso como unha das grandes figuras do rock estatal.
O peche da noite correu a cargo de The Rapants, convertidos xa nun dos fenómenos musicais máis destacados do panorama galego. A banda de Muros presentou os temas do seu novo traballo discográfico, "Rapants Club", nun espectáculo cheo de forza que fixo vibrar ao público ata os últimos minutos do festival.
Máis alá da música, a gastronomía converteuse nun dos grandes atractivos da cita. O espazo impulsado polo Grupo Cuevas e coordinado polos chefs da asociación Cociña Ourense foi un dos puntos máis concorridos da noite. As propostas elaboradas con produtos de proximidade recibiron unha gran acollida entre os asistentes, que puideron degustar creacións como o Pan Buey Bun de Alberto Fernández, a focaccia de ensaladilla de Marco Varela ou a hamburguesa de boi de Martín Fernández, con opcións adaptadas para persoas vexetarianas e con alerxias alimentarias.
Tras este exitoso arranque, o festival xa mira cara ás súas próximas citas. O 31 de xullo trasladarase ao Carballiño cun concerto gratuíto da histórica banda Burning na Praza da Veracruz. O peche da edición terá lugar o 4 de outubro no Pazo dos Deportes Paco Paz de Ourense, coa actuación de Luz Casal, que regresará á cidade despois de sete anos.
O Festival Ou Yeah! está organizado por Escena Sonora e Thinking Up Events, co apoio da Xunta de Galicia, a través da Axencia Turismo de Galicia no marco dos Concertos do Xacobeo, da Deputación de Ourense e do Concello do Carballiño.