Sanidade

O centro ourensán conta cunha unidade de asma acreditada pola Sociedade Española de Pneumoloxía e Cirurxía Torácica

O Hospital Universitario de Ourense súmase á conmemoración do Día Mundial da Asma, que se celebra mañá martes 5 de maio baixo o lema “A asma NON é un xogo”. A xornada pon o foco na importancia do control da enfermidade, a educación sanitaria e a atención especializada aos pacientes con formas moderadas ou graves.

O centro ourensán conta cunha unidade de asma acreditada pola Sociedade Española de Pneumoloxía e Cirurxía Torácica, que desde 2022 atende arredor de 300 pacientes ao ano. Nesta unidade traballan dúas pneumólogas e unha enfermeira especializada, cuxo papel resulta clave na formación e acompañamento dos pacientes.

Este dispositivo asistencial está especialmente orientado a persoas con asma moderada ou grave, nas que os tratamentos inhalados a altas doses non conseguen un control axeitado da enfermidade nin unha boa calidade de vida. Nestes casos, a incorporación de terapias biolóxicas está a ofrecer novas alternativas con resultados considerados prometedores polos profesionais.

Na actualidade, 155 pacientes da área de Ourense reciben tratamento biolóxico para a asma. Trátase de anticorpos monoclonais administrados mediante inxección subcutánea, con pautas que poden variar entre quince días, un mes ou dous meses segundo cada caso. Estes fármacos actúan sobre mecanismos específicos da inflamación e permiten reducir crises, visitas a urxencias e o uso repetido de corticoides. As primeiras doses adminístranse na propia unidade cun período de observación, e posteriormente moitos pacientes poden continuar coa autoadministración no seu domicilio, ao tratarse de medicación de dispensación hospitalaria.

Segundo explica a doutora Coral González, responsable da Unidade de Asma, a evolución destas terapias nos últimos anos permite ser optimistas tanto pola resposta clínica como pola incorporación progresiva de novas opcións de tratamento.

A unidade tamén concede unha especial importancia á educación sanitaria, á información e á comunicación cos pacientes, incluíndo un teléfono de contacto para resolver incidencias e mellorar o seguimento. Neste sentido, a enfermaría especializada ten un papel fundamental na formación sobre o uso correcto dos inhaladores, na detección de síntomas de alarma, na adherencia ao tratamento e nas recomendacións de estilo de vida, co obxectivo de que cada paciente coñeza mellor a súa enfermidade e saiba actuar ante posibles empeoramentos.

A pesar dos avances terapéuticos, os profesionais insisten en que aínda existen pacientes con falta de control da enfermidade, polo que é necesario reforzar a formación, o seguimento clínico e a implicación compartida entre sanitarios e pacientes.

As unidades de asma acreditadas en Galicia contribúen ademais á subespecialización, á actualización profesional e á mellora da calidade asistencial, así como á participación en proxectos de investigación e ao traballo en rede entre expertos.

No caso de Ourense, a unidade tamén atende situacións específicas como a asma durante o embarazo, a asma de orixe ocupacional ou a asociada á práctica deportiva, adaptando o manexo ás necesidades de cada paciente.