O Mago Fernando Moreno levará o espectáculo “Superpoderes máxicos” ao Parque dos Patos da Valenzá
O Concello de Barbadás continúa coa programación do Verán Cultural coa actuación do Mago Fernando Moreno, que presentará este xoves 6 de agosto o espectáculo “Superpoderes máxicos” no Parque dos Patos da Valenzá.
A cita comezará ás 21.00 horas e ofrecerá unha proposta pensada para o desfrute de pequenos e maiores, na que a maxia será a protagonista.
Ao longo do espectáculo, Fernando Moreno combinará diferentes trucos de ilusionismo con números musicais e dinámicas interactivas nas que o público poderá participar, convertendo a actuación nunha experiencia dirixida a toda a familia.
A actividade forma parte da programación estival organizada polo Concello de Barbadás para dinamizar os espazos públicos do municipio con propostas culturais e de lecer durante os meses de verán.