O OUFF entrega os premios da súa II Residencia Audiovisual Faíscas a dúas curtametraxes galegas
O Centro Cultural Marcos Valcárcel de Ourense acolleu esta tarde a entrega de premios da segunda edición da Residencia Audiovisual Faíscas, unha iniciativa que se consolidou dentro do marco do OUFF (Ourense Film Festival) como un espazo dedicado á creación, a aprendizaxe e o impulso do talento emerxente no sector audiovisual galego.
Ao acto asistiron Marcos Vázquez, director técnico do OUFF, e José Luis Rebordinos, director do Festival de Cine de San Sebastián, que acompañaron aos participantes nesta xornada final da residencia.
O primeiro premio desta segunda edición foi para o proxecto 'The making of Machada Sanguínea 4: O leñador eterno', obra de Daniel Sabucedo Sequeiros, Andrew Fernández Pardo, Eva García Peña, Roi López Pato e Pablo Bahamonde Sánchez. O segundo galardón recaeu en 'Só ida', do director Álvaro Pombo Feijóo.
Durante varias xornadas de convivencia e traballo creativo no centro de Ourense, os equipos participantes desenvolveron os seus proxectos baixo a titoría de Zeltia Outeiriño, ademais de recibir unha clase maxistral a cargo de Anxos Fazáns. Este proceso creativo, desenvolvido nun tempo limitado, rematou coa realización e presentación das curtametraxes, que puxeron de manifesto a orixinalidade e o dinamismo das novas xeracións do audiovisual galego. Os traballos presentados nesta edición amosaron, así mesmo, a habilidade dos participantes para converter a cidade de Ourense nun auténtico escenario de creación e experimentación cinematográfica.
Os proxectos gañadores
'The making of Machada Sanguínea 4: O leñador eterno', gañador desta segunda edición da Residencia Audiovisual Faíscas, preséntase como unha comedia con formato de falso documental centrada no asasino dunha película slasher de escasa calidade dos anos oitenta, ambientada en Ourense. A trama segue a Eduardo Nogueira, un home lobo que converteu a súa maldición nun oficio, mentres relata a súa historia fronte á cámara e busca vinganza contra aqueles que se instalan no seu territorio encantado.
O segundo premio foi para 'Só ida', de Álvaro Pombo Feijóo, un filme que narra a historia dun mozo procedente dun pequeno pobo que se traslada a Ourense coa intención de labrarse un futuro xunto ao seu tío. Porén, tras encadear varios fracasos laborais e verse envolto en situacións de carácter absurdo, o protagonista remata regresando á súa localidade de orixe no último autobús do día.
Con esta entrega de premios péchase a segunda edición de Faíscas, unha experiencia de creación colectiva que reafirma a aposta do OUFF polo acompañamento, a formación e a proxección das novas voces do audiovisual galego.