O Ourense Film Festival arrinca a súa 31ª edición coa presentación dos xurados e dous novos premios
O Ourense Film Festival (OUFF) celebrou na tarde do 10 de setembro o acto institucional de presentación da súa 31ª edición, que tivo lugar no Pazo de Vilamarín. Ao encontro asistiron autoridades, patrocinadores, entidades colaboradoras, representantes de medios de comunicación e parte do equipo organizador do festival, que este ano se desenvolverá entre o 25 de setembro e o 4 de outubro.
A benvida correu a cargo de Marcos Vázquez, director da área de Cultura da Deputación de Ourense e director técnico do OUFF, quen deu paso á intervención do director artístico do certame, Óscar Doviso. Este repasou as claves da programación deste ano, poñendo o acento na variedade de propostas, o peso outorgado á memoria cinematográfica e a ampliación do alcance territorial do festival. Tras proxectarse un vídeo cun adianto dalgúns dos contidos previstos e agradecer a súa implicación aos colaboradores, Doviso procedeu a dar a coñecer a composición dos xurados desta edición.
O festival contará con tres seccións oficiais competitivas —Internacional, Panorama Galicia e Curtametraxes— cuxos xurados están formados por profesionais de distintos ámbitos da industria audiovisual, tanto nacional como internacional.
Na Sección Oficial Internacional participarán a actriz italiana Federica Sabatini, coñecida por traballos como Suburra, Toy Boy, Prophecy e a serie Don Matteo; o produtor Pablo Barinaga, con experiencia en producións para plataformas como Netflix, Disney+ e Amazon Prime Video; a actriz e dramaturga Marta Belenguer, vinculada a series como Camera Café e candidata ao Óscar pola curtametraxe 7.35 de la mañana; o deseñador de vestiario Fernando García, gañador de dous premios Goya; e a directora de arte Ana Alvargonzález, recoñecida cos premios Goya e Gaudí e colaboradora na serie Xogo de tronos.
O xurado da Sección Oficial Panorama Galicia estará presidido por Francis Lorenzo, un dos intérpretes máis recoñecidos da ficción española. Acompañarano a xornalista Amalia Enríquez, membro da Academia de Cine e votante dos Óscar; o actor e director de dobraxe Luís Iglesia, en representación de AISGE; e as cineastas Ariadna Silva Fernández, galardoada cun Premio Mestre Mateo, e Adriana Páramo, investigadora e directora con proxección internacional, que actuarán como representantes de CREA e CIMA, respectivamente.
Pola súa banda, a Sección Oficial de Curtametraxes reunirá a actriz Chacha Huang, con papeis en producións como La casa de papel, Zorro e Xiao Xian; a Carla Nieto, con traxectoria en cine e televisión tanto en España como en México; e ao actor e cineasta Nani Matos, que participou en series como Fariña e ademais dirixe curtametraxes.
Doviso subliñou que a programación desta 31ª edición está pensada para dar cabida a públicos con distintos intereses culturais e cinematográficos, e trasladou o ánimo do equipo organizador ante o que definiu como un paso adiante na proxección nacional do festival, salientando o crecente interese recibido desde fóra de Galicia.
Durante o acto tamén interveu, en representación da Xunta de Galicia, o director da Axencia Galega das Industrias Culturais, Jacobo Sutil, quen destacou a traxectoria do festival como o evento das súas características máis lonxevo da comunidade, consolidado tras tres décadas como referencia na promoción do cine galego e español, ademais de plataforma para a produción internacional máis recente. Sutil valorou así mesmo a colaboración público-privada que sustenta o proxecto e o seu papel na difusión do audiovisual galego.
A continuación, a directora de Promoción de Turismo de Galicia, Carmen Pita, puxo en valor a vinculación do OUFF coa promoción turística, ao considerar que a cultura constitúe un dos principais motivos para viaxar e que o cinema ten unha capacidade especial para amosar un territorio. Pita destacou o papel do festival como punto de encontro entre cultura, turismo e territorio, capaz de proxectar a imaxe da provincia cara ao exterior.
O acto pechouse coa intervención do presidente da Deputación de Ourense, Luis Menor, quen sinalou que o OUFF representa o tipo de proxectos culturais que a institución quere apoiar, pola súa capacidade de xerar actividade económica, atraer talento e visitantes, e contribuír á marca Ourense. Menor anunciou ademais dous dos recoñecementos que se entregarán nesta edición, que se suman á xa coñecida Calpurnia de Honra concedida a Javier Gutiérrez: o Premio Especial OUFF, que recibirá a actriz Charo López pola súa traxectoria en cine, teatro e televisión, e o Premio Chano Piñeiro, que se outorgará a José Manuel Lorenzo pola súa contribución ao desenvolvemento do sector audiovisual galego.
O encontro concluíu cunha fotografía de familia entre autoridades, patrocinadores e equipo do festival, seguida dunha recepción no propio Pazo de Vilamarín organizada por Galicia Calidade, que serviu de espazo de encontro entre profesionais e entidades colaboradoras. Con este acto, o OUFF dá inicio oficialmente a unha nova edición coa que reafirma a súa aposta polo cine galego e pola proxección cultural da provincia de Ourense.