O PP de Ourense propón emendar a moción do PSOE sobre sanidade para evitar o “alarmismo” no debate
O PP de Ourense presentará no vindeiro pleno da Deputación unha emenda á moción do PSOE sobre sanidade pública co obxectivo de promover o que define como “un debate rigoroso, con datos actualizados e afastado do alarmismo” arredor dos hospitais comarcais.
A formación popular formula manter o apoio institucional a estes centros sanitarios, aínda que propón eliminar referencias que considera “inexactas e desactualizadas”, especialmente no relativo ao Hospital Comarcal de Verín.
Na súa iniciativa, o PP defende o papel dos hospitais comarcais como servizos fundamentais para a cohesión territorial e aposta por reforzar a cobertura de especialistas, recuperar o servizo de Hospitalización a Domicilio (HADO) e avanzar nun plan específico de apoio á sanidade no medio rural.
O grupo popular sostén que a Xunta de Galicia “leva anos realizando un esforzo sostido para reforzar os hospitais comarcais”, tanto en persoal como en infraestruturas e equipamento tecnolóxico. Neste contexto, sinala que o Hospital de Verín incrementou o seu cadro médico nun 37,5 % entre 2024 e 2025, coa incorporación de 15 especialistas en distintas áreas.
Engade ademais que máis do 90 % das prazas de especialistas do centro están actualmente cubertas, o que tería permitido reorganizar servizos e mellorar a atención ás persoas pacientes.
O PP prevé tamén a posta en marcha antes de final de verán do novo equipo de Hospitalización a Domicilio no distrito sanitario de Verín, que incluirá atención paliativa.
A formación popular critica igualmente que a moción socialista utilice datos que considera “antigos” para describir a situación sanitaria da comarca, e afirma que varias especialidades rexistran demoras inferiores a 20 días, mentres que outras practicamente non presentan listas de espera.
En materia de investimentos, o PP destaca actuacións como o novo edificio de urxencias e PAC do Hospital de Verín, cun investimento de 4,9 millóns de euros, así como a renovación tecnolóxica e enerxética do complexo hospitalario.
Así mesmo, lembra que en 2026 está prevista a licitación de novas obras de reforma no centro por valor de 1,5 millóns de euros.