O programa EmprendOU en Feminino suma 80 solicitudes na primeira semana e marca o mellor arranque da súa historia
A Deputación de Ourense rexistrou 80 solicitudes na primeira semana da convocatoria de EmprendOU en Feminino 2026, un dato que supón o mellor inicio do programa desde a súa creación e que reflicte o interese das emprendedoras da provincia por esta liña de apoio á creación e consolidación de negocios liderados por mulleres.
O prazo de presentación de solicitudes abriuse o pasado 23 de xullo, tras a aprobación das bases pola Xunta de Goberno e a súa publicación no Boletín Oficial da Provincia. A convocatoria permanecerá aberta ata o 30 de outubro, salvo que o crédito dispoñible se esgote antes. Segundo a institución provincial, desde o primeiro día mantense unha media de dez solicitudes diarias, un ritmo que continúa durante o mes de agosto.
A edición deste ano reserva o 75% do crédito aos proxectos desenvolvidos en concellos de menos de 20.000 habitantes, co obxectivo de reforzar o emprendemento como ferramenta para dinamizar a economía local, favorecer a creación de emprego e contribuír á fixación de poboación no rural.
A Deputación destaca que cada novo proxecto empresarial promovido por unha muller representa unha oportunidade para fortalecer o tecido económico da provincia e consolidar a actividade e os servizos nos municipios con maiores desafíos demográficos.
A convocatoria de 2026 está dotada cun orzamento de 150.000 euros. Cada iniciativa beneficiaria recibirá unha axuda fixa de 915,75 euros, equivalente ao 75 % do salario mínimo interprofesional, á que poderá sumarse un importe complementario se, unha vez resoltas todas as solicitudes, existe dispoñibilidade orzamentaria.
Ademais, as emprendedoras que xa obtiveron apoio na edición de 2025 e manteñen a súa actividade contan cun procedemento de tramitación preferente durante os primeiros 30 días hábiles do prazo de presentación, unha medida orientada a facilitar a continuidade dos seus negocios.
As beneficiarias incorporaranse tamén á Rede EmprendOU en Feminino, unha iniciativa que fomenta a colaboración entre emprendedoras da provincia mediante o intercambio de experiencias, a formación e a creación de sinerxías.