O Programa Luz Pozo Garza en Barbadás pon o foco na discriminación que sofren as mulleres e nenas con discapacidade
O Concello de Barbadás mantén en marcha as actividades do Programa Luz Pozo Garza, unha iniciativa financiada polo Fondo Social Europeo e a Xunta de Galicia orientada a mulleres de todas as idades que se atopan en situación de especial vulnerabilidade. Dentro desta programación, o Centro Ocupacional e Residencial As Burgas foi este martes escenario dunha sesión formativa centrada na discriminación particular que padecen as mulleres e nenas con discapacidade.
A charla estivo a cargo da avogada e consultora Laura Seara, quen expuxo ante os asistentes como estas mulleres, ademais de sufrir a desigualdade estrutural que afecta ao conxunto do xénero feminino, deben facer fronte a barreiras e formas de discriminación adicionais derivadas da súa discapacidade. Neste sentido, lembrouse que en España o 60 % das persoas con discapacidade son mulleres, aínda que apenas un 22 % delas consegue desenvolver unha vida autónoma.
No encontro tomaron parte numerosas usuarias e usuarios, así como traballadoras do propio centro, o que permitiu xerar un espazo de diálogo arredor dos dereitos das mulleres con discapacidade, con frecuencia vulnerados. Entre os asuntos tratados figuraron as dificultades que aínda hoxe atopan estas mulleres para acceder á sanidade, incorporarse ao mercado laboral, obter resposta no ámbito da xustiza ou poder formar unha familia e vivir a súa maternidade en igualdade de condicións.
Está previsto que ao longo de setembro continúen desenvolvéndose en Barbadás novas actividades enmarcadas no Programa Luz Pozo Garza, dirixidas, como nesta ocasión, a mulleres de todas as idades.