O programa Maruxa Mallo levará a Paderne de Allariz o Cine Fórum “La mujer, cosa de hombres”, de Isabel Coixet
O Concello de Paderne de Allariz acollerá o vindeiro 21 de agosto, ás 19.30 horas, o Cine Fórum “La mujer, cosa de hombres”, impartido por Isabel Coixet. A actividade está dirixida ás mulleres do municipio e enmárcase dentro do programa Maruxa Mallo.
Esta iniciativa é promovida conxuntamente polos concellos de Esgos, Nogueira de Ramuín e Paderne de Allariz co obxectivo de fomentar o benestar das mulleres, favorecer a súa formación e impulsar o seu empoderamento.
Ademais deste tipo de encontros, o programa Maruxa Mallo desenvolve ao longo do ano diferentes obradoiros e actividades formativas, así como servizos de apoio psicolóxico, xurídico e laboral. A iniciativa tamén ofrece orientación personalizada para facilitar ás participantes o acceso a recursos e oportunidades que contribúan ao seu desenvolvemento persoal e profesional.
As persoas interesadas poden solicitar máis información a través do Concello de Paderne de Allariz, do servizo de WhatsApp habilitado para o programa ou do correo electrónico dos servizos sociais municipais.