Política

Os socialistas locais alertan do risco para a seguridade viaria e de incendios pola acumulación de vexetación na vía autonómica que comunica Barral con Celanova e pide unha actuación inmediata

O PSdeG-PSOE de Cartelle denuncia o estado de “abandono” que, segundo a formación, presenta a estrada autonómica OU-404 ao seu paso polo municipio, unha vía de titularidade da Xunta de Galicia que comunica Barral con Celanova.

Os socialistas sinalan que a proliferación de maleza e vexetación está a invadir as marxes da estrada, ocultando espazos e chegando mesmo a afectar a varias vivendas situadas na contorna. Ao seu xuízo, esta situación ofrece unha imaxe de falta de atención e supón un risco tanto para a seguridade viaria como para a prevención de incendios forestais.

Desde o PSdeG-PSOE de Cartelle indican que o crecemento da vexetación provoca un deterioro da contorna e pode reducir a visibilidade en determinados puntos da vía, dificultar o tránsito e limitar o mantemento das marxes. Ademais, consideran especialmente preocupante a situación coa chegada do verán e a época de maior risco de incendios.

O voceiro do PSdeG-PSOE de Cartelle, Jesús Pereiras Vázquez, critica que “a Xunta volve demostrar que Cartelle non está entre as súas prioridades”. Segundo afirma, mentres noutras zonas se realizan traballos de limpeza e conservación, neste caso “atopámonos cunha estrada completamente abandonada, con maleza que invade espazos públicos e mesmo chega a afectar a propiedades particulares”.

Pereiras asegura que non se trata dunha cuestión estética, senón dun problema relacionado coa seguridade. “Hai tramos nos que a vexetación dificulta a visibilidade dos condutores e incrementa o risco de accidentes, ao tempo que se acumula unha importante carga de combustible vexetal xusto ao carón das vivendas e da propia estrada”, sinala.

O portavoz socialista considera “inadmisible” que a Consellería competente non estableza un mantemento periódico dunha vía autonómica que, segundo indica, soporta un importante tránsito diario e conecta diferentes núcleos de poboación da comarca.

“Os veciños e as veciñas pagan impostos e teñen dereito a que as infraestruturas autonómicas se manteñan en condicións. Non se pode esperar a que ocorra un accidente ou, peor aínda, que se produza un incendio para reaccionar. A prevención faise antes e non cando xa é demasiado tarde”, afirma Pereiras.

O PSdeG-PSOE de Cartelle reclama á Xunta de Galicia que acometa “de maneira inmediata” unha limpeza integral das marxes da OU-404 no municipio, coa retirada da maleza acumulada e co obxectivo de garantir a seguridade da circulación e a protección das vivendas próximas á estrada.

A formación socialista insiste en que existe “unha absoluta falta de planificación e de interese por parte do Goberno galego” e considera que o estado da vía é unha mostra, segundo indican, da falta de atención ao rural e aos concellos do interior.

As imaxes difundidas polo PSdeG-PSOE de Cartelle en distintos puntos da OU-404 amosan, segundo a formación, un avanzado estado da vexetación, con silveiras e plantas que cobren muros, invaden as marxes da estrada e rodean edificacións.