O PSdeG de Ourense critica a falta de cumprimento das medidas anunciadas tras os incendios do pasado verán
O PSdeG-PSOE de Ourense acusa á Xunta de Galicia e á Deputación de Ourense de chegar ao verán sen ter executado as medidas anunciadas tras a vaga de incendios rexistrada na provincia o ano pasado, nun contexto no que xa se producen os primeiros lumes, como o de Boborás.
O secretario provincial do PSdeG-PSOE de Ourense, Álvaro Vila Araújo, advertiu de que o incendio de Boborás é “un aviso do que pode vir nas próximas semanas” e sostén que a provincia afronta a época de maior risco “sen avances reais en prevención”.
Segundo os socialistas, a situación actual evidencia que as actuacións preventivas seguen sen estar completadas a mediados de xuño, especialmente no que respecta ás franxas secundarias e ás tarefas de limpeza e xestión do territorio.
Vila critica que o presidente da Xunta, Alfonso Rueda, comprometese a asumir a limpeza das franxas secundarias nos pequenos concellos e que, meses despois, esa responsabilidade continúe a ser trasladada ás administracións locais. Nese sentido, reclama que se cumpran os compromisos adquiridos tras a vaga de incendios do ano pasado.
O PSdeG-PSOE considera ademais que seguen sen activarse ferramentas estruturais como a nova Lei de Incendios Forestais ou o Plan Director da Industria Forestal, que consideran necesarias para mellorar a ordenación do territorio e a prevención.
No plano provincial, os socialistas critican tamén a falta de avances na Mesa Provincial de Incendios, creada tras os lumes do pasado ano. Segundo indican, o órgano non tería derivado en medidas concretas nin en actuacións aplicadas sobre o territorio.
O responsable socialista sinala que a provincia “continúa nunha situación de vulnerabilidade similar á do ano pasado” e alerta de que a acumulación de biomasa tras as choivas dos últimos meses podería aumentar o risco de grandes incendios no verán.
O PSdeG-PSOE de Ourense reclama un cambio de modelo baseado na prevención, na coordinación entre administracións e na xestión estrutural do territorio. “Non podemos actuar só cando aparece o lume. A mellor ferramenta contra os incendios é a anticipación. Previr salva montes, protexe vivendas e dá seguridade á veciñanza. Porque cada verán conta. E cada día perdido tamén”, sinala o secretario provincial.
Os socialistas engaden ademais que o compromiso anunciado pola Xunta de asumir directamente a limpeza das franxas secundarias nos concellos de menos de 10.000 habitantes segue sen materializarse, mantendo, segundo denuncian, a responsabilidade sobre os municipios a través de convenios e da empresa pública Seaga.
“O máis grave é que non estamos falando dunha promesa electoral nin dunha declaración xenérica. Estamos falando dun compromiso adquirido polo propio presidente da Xunta despois da maior vaga de incendios que recorda esta provincia. Pasou un ano, os montes seguen cargados de biomasa, as franxas continúan sen estar completamente limpas e os concellos seguen asumindo obrigas que a Xunta prometeu asumir directamente”, sinala Vila.