O PSdeG Ourense destaca o compromiso do Goberno para modernizar a base de mantemento ferroviario na cidade
O PSdeG-PSOE de Ourense destaca o compromiso do Goberno de España coa modernización das infraestruturas ferroviarias da provincia, subliñando o investimento que supera os 4,5 millóns de euros que Renfe está a executar na base de mantemento da cidade.
A deputada socialista no Congreso, Marga Martín Rodríguez, e o senador Rafael Rodríguez Villarino destacaron que esta actuación “enmárcase no Plan Integral de Talleres e Mantemento e permitirá a renovación integral de dúas naves clave das instalacións ourensás, reforzando a capacidade técnica e operativa do complexo ferroviario”.
En concreto, as actuacións inclúen a modernización da nave de Autopropulsados, á que se destinan máis de 2,5 millóns de euros para o mantemento de trens diésel, e a renovación da nave de Levante, cun investimento superior a 1,5 millóns de euros, onde se incorporarán bancos de probas de última xeración e equipamento especializado.
Marga Martín salientou que “este investimento evidencia que o Goberno de España ten a Ourense no centro das súas prioridades, apostando pola modernización dun sector estratéxico como o ferroviario”. Ademais, engadiu que “a mellora dos talleres non só incrementa a capacidade e calidade do servizo, senón que tamén supón unha oportunidade para consolidar emprego cualificado e actividade industrial na provincia”.
Pola súa parte, o senador Rafael Villarino apuntou que “estamos ante unha actuación clave que reforza o papel de Ourense como nó ferroviario de referencia en Galicia”. Tamén afirmou que “fronte á inacción doutros gobernos, hoxe vemos feitos concretos, investimentos reais e unha planificación que garante o futuro das infraestruturas públicas”.
O proxecto incorpora tamén unha liña de sustentabilidade, coa instalación de paneis fotovoltaicos para autoconsumo nas cubertas das naves, cun investimento duns 400.000 euros, co obxectivo de mellorar a eficiencia enerxética das instalacións.
As obras desenvolveranse ata o ano 2027 e forman parte dunha estratexia estatal máis ampla de modernización ferroviaria, orientada á incorporación de novas tecnoloxías e á mellora do servizo público.
Desde o PSdeG-PSOE de Ourense destacan que esta intervención permitirá adaptar as instalacións ás necesidades actuais do sector, mellorando as condicións de traballo e a eficiencia dos procesos de mantemento, co impacto positivo que isto terá no servizo ás persoas usuarias. Os socialistas reafirman, ademais, o seu compromiso de seguir impulsando investimentos estratéxicos para o desenvolvemento económico, industrial e social da provincia.