O PSOE reivindica máis de 40 millóns de euros para recuperar o patrimonio cultural de Ourense

OurenseXa
As actuacións na Biblioteca Nós, o Arquivo Histórico Provincial e o Museo Arqueolóxico suman 40,5 millóns de euros e permitirán modernizar espazos culturais e preservar a historia da provincia
OURENSE psoe
22 Nov 2026

O PSdeG-PSOE de Ourense reivindica o investimento realizado polo Goberno de España na recuperación e modernización de varios edificios históricos da provincia, cunha dotación conxunta superior aos 40,5 millóns de euros. A candidatura socialista destaca especialmente as actuacións no complexo cultural de San Francisco e no Museo Arqueolóxico Provincial, que buscan preservar o patrimonio e dotar á cidade de novos espazos culturais.

A intervención no antigo convento de San Francisco supuxo un investimento de 23,8 millóns de euros, repartidos entre a Biblioteca Pública Nós, que recibiu 12 millóns, e a rehabilitación do claustro e do Arquivo Histórico Provincial, cunha partida de 11,8 millóns de euros.

A recuperación deste complexo permitiu dar novos usos a un edificio emblemático, vinculado agora á lectura, á conservación documental e á divulgación histórica. O Arquivo Histórico Provincial custodia fondos de gran valor para coñecer a evolución social, económica e institucional de Ourense, facilitando o seu acceso tanto a investigadores como á cidadanía.

A actuación tamén se relaciona co impulso á declaración da contorna como Lugar de Memoria, co obxectivo de reforzar a recuperación e divulgación da memoria democrática.

A candidata socialista ao Congreso, Carmen Rodríguez Dacosta, considera que San Francisco representa un exemplo de política cultural baseada na recuperación do patrimonio e na creación de servizos públicos. Segundo sinala, a intervención non se limita á rehabilitación dun edificio, senón que permite ampliar os equipamentos culturais e protexer a memoria documental e democrática.

Máis de 16,7 millóns para rehabilitar o Museo Arqueolóxico

A outra gran actuación é a rehabilitación integral do Museo Arqueolóxico Provincial de Ourense, cun investimento previsto de 16.703.600 euros por parte do Ministerio de Cultura.

O proxecto contempla 546.375 euros para servizos e traballos técnicos, 12.696.633 euros para as obras de rehabilitación arquitectónica e outros 3.460.592 euros para a renovación museográfica.

Os traballos afectarán a unha superficie construída de 5.020,36 metros cadrados e incluirán unha ampliación de 579,78 metros cadrados. A intervención permitirá recuperar o edificio histórico, renovar as instalacións e adaptar os espazos ás necesidades de conservación das coleccións.

Ademais, está prevista unha renovación completa da museografía, con novos espazos expositivos, percorridos actualizados e recursos destinados a ofrecer unha experiencia máis accesible e atractiva aos visitantes.

A candidata socialista ao Senado, María Fernández Ojea, considera que a rehabilitación permitirá situar o museo á altura da riqueza histórica e arqueolóxica da provincia. Tamén destaca o potencial destas actuacións para xerar actividade económica, atraer visitantes e impulsar o turismo cultural.

Desde o PSdeG-PSOE de Ourense sosteñen que os investimentos evidencian o compromiso do Goberno de España coa cultura pública e coa conservación do patrimonio histórico. A candidatura socialista defende que estas intervencións contribúen a recuperar edificios emblemáticos, mellorar os servizos culturais e ofrecer novas oportunidades á provincia.

0.17610096931458