O Ximnasio de Verea pecha a tempada cunha xornada lúdica inspirada no Grand Prix
O Ximnasio de Verea puxo fin á tempada cunha actividade especial de despedida na que os participantes tomaron parte nunha competición inspirada no Grand Prix.
A xornada desenvolveuse arredor dun formato por equipos, dividido entre os grupos azul e amarelo, que tiveron que afrontar diferentes probas ao longo da actividade nun ambiente marcado polo humor e a participación.
Tras o desenvolvemento dos distintos retos, e entre a rivalidade propia da competición, o equipo azul acabou proclamándose vencedor da xornada e fíxose co trofeo final, mentres que o equipo amarelo recibiu unha vaquilla como premio de consolación.
Unha vez rematada a competición, os asistentes compartiron un momento de convivencia para recuperar enerxías e pechar a tempada nun ambiente festivo.
Desde o Concello agradecen a participación de todas as persoas que formaron parte das actividades ao longo do curso, expresando tamén o desexo de manter esa implicación nos próximos anos e andan a anotarse para a vindeira tempada, que retomará as atividades no mes de setembro.
A despedida serviu tamén para trasladar un recoñecemento especial á persoa encargada das sesións e da organización da actividade de peche de curso polo seu traballo durante a tempada.