Oito responsables públicos de Ucraína chegarán a Ourense para formarse ante os retos da reconstrución
A provincia de Ourense converterase este mes nun territorio de aprendizaxe para responsables públicos de Ucraína. A Deputación foi seleccionada polo programa europeo TIPS4UA para acoller unha delegación da rexión de Zakarpattia, nunha estadía que se desenvolverá entre o 21 de setembro e o 2 de outubro e que estará xestionada polo Inorde.
A delegación estará formada por oito representantes institucionais, entre responsables rexionais e membros dos municipios de Dovhe, Kolochava e Yasinya. Durante dúas semanas coñecerán de primeira man diferentes experiencias desenvolvidas en Ourense e Galicia.
O programa abordará cuestións clave para a modernización das administracións ucraínas, como a xestión de proxectos europeos, a captación de fondos, o desenvolvemento de infraestruturas, a resiliencia enerxética, a protección ambiental, o turismo sostible e a planificación territorial.
A axenda incluirá encontros na Deputación de Ourense e visitas a diferentes puntos da provincia. Entre as actividades previstas figuran experiencias de cooperación transfronteiriza na Baixa Limia-Serra do Xurés, proxectos de recuperación do patrimonio rural e iniciativas de colaboración con Portugal.
A delegación tamén se desprazará a Santiago de Compostela para coñecer o traballo da Fundación Galicia Europa na xestión de fondos estruturais e manter un encontro no Parlamento de Galicia.
O percorrido permitirá ademais coñecer iniciativas relacionadas co turismo termal e de saúde, o tecido empresarial ourensán, a innovación tecnolóxica e a economía local. Tamén están previstas visitas ao Campus Auga da Universidade de Vigo, a proxectos de dixitalización da xestión da auga, comunidades enerxéticas, agricultura sostible e iniciativas de turismo responsable.
A participación no TIPS4UA pretende ir máis aló dunha estadía formativa. A Deputación busca establecer relacións institucionais duradeiras e abrir novas oportunidades de cooperación entre Ourense, outros territorios europeos e as administracións ucraínas.
O programa cobra especial relevancia ante os retos que afrontará Ucraína nos próximos anos. A reconstrución do país e o seu proceso de achegamento á Unión Europea esixirán administracións locais e rexionais preparadas para deseñar proxectos, acceder a financiamento internacional e xestionar novos investimentos.