Ordenan a apertura de xuízo oral contra Baltar por un delito contra a seguridade viaria
A maxistrada da Sala Penal Ana Ferrer, como instrutora da causa, ditou este xoves o auto de apertura de xuízo oral contra o senador do PP José Manuel Baltar Blanco por un presunto delito contra a seguridade viaria, na modalidade de condución de vehículo de motor a velocidade superior á legalmente permitida (215 quilómetros por hora).
Na resolución, a xuíz sinala que a Fiscalía presentou o pasado 2 de xullo escrito de acusación pedindo a apertura de xuízo oral contra o aforado, imputándolle a comisión dun delito contra a seguridade viaria, na modalidade de condución de vehículo de motor a velocidade superior en oitenta quilómetros por hora á legalmente permitida. A xuíz sinala que o relato de feitos consignados no escrito de acusación, nunha valoración provisional, puidesen ser constitutivos do delito contra a seguridade viaria.
Por iso, dita auto de apertura de xuízo oral, considera competente para o axuizamento á Sala Segunda do Tribunal Supremo, e acorda comunicar ao acusado a resolución e o escrito de acusación, para que formule o seu escrito de defensa no prazo de dez días.